Jowai: Ka National People’s Party (NPP), West Jaiñtia Hills District ynne ka sngi da pynkup burom ko ya u montri rangbah ka jylla u Conrad K Sangma, ki MLA yong ka kamjooh ki MLA ka UDP napoh ri-loom Jaiñtia wa em hapoh ka sorkar MDA.
Ya ka yalang da pynman hapoh District Library Auditorium, Jowai wa wan sakhi da kiwa krehkaam ka Party na ri-loom Jaiñtia wa kiwa mih khmat ka Party na ri-loom Khasi wa Garo.
Ka Phidalia Toi kawa man kam ka State Political Adviser ka NPP hei klam yong ka da kynmoo ko ya ki sngi nyngkong wa sdang ya ka Party wei yei chem chitom ka Party heipor wa sdang ya ka khamtam heipor wa khlaad u Purno Sangma wei da kynmoo ko leh yei yachem nyngkong ko ya u Conrad wei da yoo wa ha oo em u iwa rap phær wei katni da yoh u man kam u montri rangbah wa nyngkong dooh ka NPP.
Neiliang u Sniawbhalang Dhar u MLA ka Nartiang Constituency uwa man leh kam u montri ka C&RD da e khublei u ya waroh kiwa kreh ka Party kiwa kreh chitom wow yoh waroh kiwa jop u emlang ha kani ka sngi wei da yaroh u leh ya u Conrad uwa man u bru wa suk u yachem wow yaklam wei ym jooh yoh montri rangbah kam uni hapoh ka jylla uwa bien u ap ya waroh kiwa wan cha oo wei ym jooh em kyntait u ya kiwon kiwon leh.
U Conrad hei klam yong oo da khana u wa mynstep ha Delhi daw yachem u chirup wa kiwi ki montri rangbah wa em ki thaw Sixth Schedule hapoh ka jylla yong ki wa u montri ki kaam pohyung ka sorkar pyrdi u Rajnath Singh yow yaklam chaphang ka Sixth Schedule wa ki kyndon kow pynkylla noh ya ka kamjooh ka poisa wow pynlut.
Da ong u leh wa ka yurim wa yieñ ka Party toh neibynta kiwa khian kiwa nai kiwa da chah mylliñ iwa man leh ka yurim wa yieñ u Pa yong oo wei neini i daw manda yachem u wa ki montri yong oo kamjooh leh ki heh district ki heh ka tnat sorkar da ban joor u wym hoi u lehke ya ki Scheme wa yarap ya kiwa dooh wa duk kam wow pynpoi ya ka bai baam tymmen man ha ka chi tarik u bnai, u pynpoi ya u khoo rachon heipor wa kiwi wei ka sorkar leh u krehkaam ko deiwa phær hadien wa ha kini ki 6 bnai da chem hadooh katwon sahkut ka poisa neidaw wa tlot ka kor sorkar wei yeini waroh suki suki daw pynkylla lut ya ki.
Da khana u leh waka jylla Meghalaya katni da yoh ko chiboon ka poisa naka sorkar pyrdi bar ya iwa jooh wei da yoh T. 8000 Klur wow chna pynmiat ya ki sarokbah wa em hapoh ka jylla, naka Rural Infrastructure Development Fund (RIDF) da yoh T. 200.40 Klur wow pynku ya ka yoh ka kot kiwa im cha nongkyndong, ya ka NREGA da yoh poisa 1000.200 Klur wow pynkreh hapoh ka jylla kawa heh dooh wa da yoh da ka jylla, naka Central Road Fund da yoh T. 200.60 Klur wei ya ka National Highways & Infrastructure Development Corporation Ltd. kawa man ka Company ka sorkar India hapoh ka Ministry of Road Transport & Highways da phah ya ka wow booh ha khlieh dooh ya ka Meghalaya yow smat pyndep ya waroh ki kaam.
U Conrad leh da pynbna u wa daw lai sdang ya ka NPP hapoh ka jylla Mizoram wei daw sdang leh u yakhun Election ha kiwa noon ki jylla hapoh ka ri.
Ha kani ka sngi da pynkup burom leh ya kiwa kitkaam ka Party napoh ri-loom Jaiñtia.
Discussion about this post