Kam chibynta wow pynchlur wei wow e mynsien ya ki khon khynroo khyllood wa puræ puthi yong ka chnong, ka Dorbar Chnong Pamrakmai, EJH da pynman ko ya ka yalang e khusnaam ya ki khon ka chnong kiwa da pyndep ya ka SSLC, HSSLC wa Graduation yong uni u snem 2022 heiwa da em 21 ngut.
Ha kani ka yalang pynkup burom wa da pynman ynnin ka 12 tarik da wan wow sakhi lang da u MLA ka thaaiñ, u Kyrmen Shylla kam u kongsan hei emlang kiwa kitkaam chnong, kiwa chah khut sñiawbha, kiwa sikai, ki khynnah skur deilang wa ki paidbah wa chong chnong.
U kongsan da e yaroh u ya ka dorbar chnong wa da pynman ko ya kam kani ka yalang wow pynchlur wow e mynsien ya ki khon khynroo khyllood yong ka chnong kiwa da ye u pyndep kamjooh ya kiwi wa dang puræ puthi ha ki kyrdan waphær waphær. Da kyntu u leh wow nang leh chitom chooh chooh hei puræ puthi.
Kam uwa mihkhmat ka thaaiñ da pynsñiaw u wa da pyrchang u wow yarap u lehbha kamjooh u thooh laad wow pynyoh yei roi i paar yong ka chnong, ya ini da pynsñiaw hadien wa ka chnong da e dorkhat ko wow pynkynmoo heiyatoh i dawa Yung Dorbar wa thymme wa ki Street Light hapoh ka chnong.
Cha ki 21 ngut da e sñiawbha da ki tiar sah kynmoo deilang wa ka poisa.
Ya kani ka yalang da pynlai da u Jamris Siangshai uwa man u Chairman Chnong, i ktien pdiangburom na u Waheh Chnong, u Iaikiewbha Rymbai wei da pynbood sei klam wai phang na u Secretary Chnong u Wellson R D Siangshai.
Kiwa klam ha kani ka sngi da kynthup ki nadooh u Chanmiki War uwa man kam u Asst. Professor, Political Science Department yong ka KNGC, Jowai, u Nathan Ribok Biam, President JSM-Western Region, ka Kiewlang Dkhar, Advocate na ka chnong Wapung Skur wa ka Everstay Dkhar ka General Secretary, JSM Women’s Wing CB.
Da pynphooh pynphieñ ya kani ka sngi dei chaad na ka Iahunlang VO wa i rwai na u Bettering Dkhar wei da pynkut da ki kyntien sñiawngooh na u Bormi Dkhar uwa man u Asst. Waheh Chnong.
Ka Wyrta na u Secretary Chnong, u Wellson R D Siangshai.
