Ka seiñ kiwa kreh PM Poshan wa tip kam ka PM Poshan Worker Union yong ka East Khasi Hills District ynne ka sngi da pynkup burom ko ya u Adviser yong ka seiñ, u Khroo Lamsalanki Pariat ha National Khasi Durbar Hall, Mawkhar Shillong.
Haka yalang leh burom wa pynlai da u Mankara Kharjamuti, Secretary PM Poshan Worker Union yong ka East Khasi Hills, da wan emlang u President wa Secretary yong ka All Jaiñtia Mid Day Meal Workers Union wa ka Ri-Bhoi District PM Poshan Worker Union.
Da sdang yaka yalang dei duwai wa yahkhmat da ka Jena Nengnong, President PM Poshan Worker Union yong ka East Khasi Hills, wei da yoh i klam naka President yong ka Ri-Bhoi, ka Banalis Syiem wa na u President ka All Jaiñtia Mid Day Meal Workers Union, u Jerry Anderson Suting heiwa da khana ki kammon yahluti u Khroo Lamsalanki Pariat ya ki.
Neitæ da yoh i pynche heiyatoh i kaam yong kiwa chet ja-sngi haki skur na u Khroo Lamsalanki Pariat wei da pynwai yaka yalang dei duwai kyrkhu na u Charles Shongwan.
