Ka Rotary Club Jowai kam kawi na ki seiñ kreh mon sñiawbha wa em hapoh ka West Jaiñtia Hills District kawa da leh chiboon ki kaam wa yatoh wei miat i bha ka imlang sahlang, ha ka sngi Musiang 1 tarik Naichiphaw dei sñiawngooh sñiawburom ya ki kaam wa da leh da ki bru ka Health Department wa ka Home Guard & Civil Defence Department, West Jaiñtia Hills hajrong ka thong wow e i chakri wei yada yei poor ka kjut COVID-19 nawi hawi, da chim ko wow pynman ka yalang pynkup burom wa tip kam ka Appreciation & Recognition Award.
Yeini i pynkup burom da pynman ha Infinity Conference Hall, Mooralong hei sakhilang u Dr. P. Nongtdu, Principal Jaiñtia Eastern College, Khliehriat kam u kongsan hei emlang ka Rtn. Easter F. Gatphoh (MPHF), Charter President RC-Jowai wei ha ka yalang wa yoo chongkun yong kani ka sngi hei pynlai u Rtn. Samehi Laloo, (RFSM) President RC-Jowai, da yoh i klam pdiang burom na u Rtn. J.M. Pohsngap, Past President RC-Jowai katwa kiwi won kiwa da embynta ha kani ka yalang toh u Rtn. Mewothi Gatphoh, u Rtn. D.F. Majaw (PHF) Director Club Service RC-Jowai, u Rtn. Montri Passah, Immediate Past President RC-Jowai, u Rtn. Rudolf E.Laloo (PHF) RC-Jowai, u Rtn. Dr. Kamwadae Syngkon, Secretary RC-Jowai 2022-23 wa u Rtn. Rueveny Nongtdu.
Najrong i pynkup burom ya ka Health Department wa ka Home Guard & Civil Defense Department da em leh i pynkup burom wa kyrpang ya u Dr. R. Pohsnem, Medical & Health Officer DMHO, In-Charge Nartiang PHC, ka Dr. H. Uriah, Medical & Health Officer DMHO, West Jaiñtia Hills wa ya kawi ka Lab Technician.
Chooh chooh ka Rotary Club Jowai dei sñiawsarong yei ku kyrdan yong u Rtn. Yoo Franky Laloo kam u Executive Engineer MSPCB, Shillong ha kani ka yalang da pynman ko leh i pynkup burom ya oo.
U Rtn. S.K. Lato, (PHF) Director of Community Service RC-Jowai hawa e kyntien ha kani ka yalang da pynsñiaw u yei parom wa tbian ka Rotary International wei da ong u leh ka Rotary kreh ko hajrong ki le tylli ki ‘H’ iwa mut Health, Hunger, Humanity neitæ kam ki dkhot won toh u kreh i hajrong ki le tylli ki ‘O’ iwa mut Open Mind, Open Heart wa Open Hand.
U Dr. P. Nongtdu hawa e kyntien kam u kongsan da yaroh u ya ki kaam ka Rotary Club Jowai kam ka seiñ wa e sakhiat i chakri yei miat i bha ka imlang sahlang wei chooh chooh pachat u leh ki kyntien e mysnien ya ki bru wa da chah pynkup burom ha kani ka sngi. Iwa khaddooh khut kyrsu kyntu u ya ka Rotary Club Jowai wow sdang noh ko u kreh yei kaam ha ki bynta ka East Jaiñtia Hills neibynta i miat i bha ka imlang sahlang yong ki bru wa chong chnong.
