Ka Rotary Club Jowai hei janmiet ka sngi Muchai 19 tarik Naisan da pynman ko yaka yalang wow pdiang burom yei wan yoohkjat u Dr. M.S. Konwar Major Donor, District Governor 3240 wei ya kani ka yalang da pynman ha Infinity Conference Hall Mooralong, Jowai.
U Rtn. M. Passah, MPHF President Rotary Club Jowai kam u chongknor yong ka yalang da e u ki kyntien yahkhmat wei katkam ka rukom yong ka Rotary kam wow kdar luti won ya ki bynta wa chakhmat da rwai leh yei sur National Anthem da waroh ki dkhot neitæ pynbood wan ka bynta i leh burom ya kiwa chah khut sñiawbha wa da pynlai da u Rtn. D.F. Majaw, PHF Director of Club Service katwa u Rtn. Rudolf E. Laloo PHF da e u ki kyntien pdiang burom wa u Rtn. S. Laloo RFSM won hawa kut da pachat u ki kyntien sñiawngooh.
Chooh chooh ha kani ka yalang da yoh leh u ap yei khana pysñiaw u Rtn. Dr. K. Syngkon yei krehkaam ka seiñ katwa ka Rtn. E.F. Gatphoh, MPHF, Chairperson of Rotary Foundation Committee da khana pynsñiaw ko yei dor yong ka poisa wa da yarap kyllooid mynsien ki dkhot cha ka yarong yong ka Rotary International wei da e kti ko leh ya ka Cheque ha u District Governor.
Heini i wan yoohkjat u District Governor 3240 da pynsah kynmoo leh ya kani ka sngi deiwa em i pynkup burom ya ki ar ngut ki khon ka chnong Jowai kawa man hei pait i pynlai u Director of Vocational Service Rtn. D. Toi wei ki bru kiwa ka Rotary Club Jowai da yoo biang ko wow pynkup yeini i burom ha uni u snem toh u R. Konel Phira uwi na kiwa thoh sur, wa pynmih phlim na ri-loom Jaiñtia wa uwa ak wa bna naam wa ya u Ram Kynjing uwi na ki bru wa em sap heiliang i chna ya ki tiar wa boonjait wei man leh uwa tah dur wa pliah wei kini waroh ar ngut toh kiwa na ka dong Panaliar.
U R. Konel Phira hawa klam ha kani ka janmiet, e u i sñiawngooh wa khroo ya ka Rotary Club Jowai kam kawi na ki seiñ wa kreh yei miat i bha ka imlang sahlang yong ki bru wa chong chnong ha kiwa boon ki rukom wei da e mynsien u leh ya ki khon ka Ri Jaiñtia wow man kiwa imsngi u pynemkaam hok yei sap wa da e u Trekirot.
U Rtn (Dr) M.S. Konwar Major Donor, District Governor 3240 hawa e kyntien ha kani ka yalang pdiang burom da yaroh u yei sap wa kyrpang yong u Konel Phira wa u Ram Kynjing wei da pynchlur u leh ya ki wow sikai pateiñ ki yeini i sap ha ki khon ki kti yong ki khnang yow im u neh u sah i sap yong ki na ka pateiñ cha ka pateiñ.
Heiyatoh won wa ka seiñ da niawtang u ya ki kaam kiwa da leh ko neibynta ka imlang sahlang khamtam ha ki por i tynjooh ka khlam COVID-19, i yarap ya kitu ki bru kiwa da maad da takhooh yei tynjooh wa khroo ha ka thma hapyrdi ka Russia waka Ukraine wei da kyrsu kyntu u leh ya ki dkhot waroh wow man kiwa kyllooid mynsien u e cha ka yarong ka seiñ.
Kiwi kiwa da klam e mynsien ya ki dkhot ka Rotary Club Jowai ha kani ka janmiet toh u Rtn. Kishan Tibrewala PHF, Assistant Governor wa u Rtn. Dr. K.S. Elangbam, District Secretary Foundation RID 3240.
