Jowai: Ka Rotary Club Jowai ynne ka sngi da pynkup burom ko ya ki artylli ki rynsan e khubor Online ka Ri-loom Jaiñtia wa kynthup ya u Wyrta.com wa u Syllad.com, neibhah wa wot hapyrdi i pynthut ka khlam COVID-19 kawa da ktah ya ka District, ka jylla wa ka pyrthai hi waroh kawi leh pteiñ bait ki yei kaamram wow thooh yutip wei wanrah ya ka khubor cha ki paidbah la heiyatoh wa kani ka khlam COVID-19 næ kiwon kiwon ki kaam.
Yei pynkup burom neibynta u Wyrta da e ha u Sajeki Passah katwa neibynta u Syllah nawon da e ha u R. Nongrum.
Yeini i pynkup burom ka Rotary Club da pyndep ko haka yalang wa da pynman ha Conference Hall ka Infinity Restaurant, Jowai hei emlang u Rtn. (Dr.) K.S. Elangbam (MPHF) Assistant Governor Zone-X 2020-21, RID 3240 kam u kongsan.
Ha kani ka sngi ka Rotary Club Jowai da pdiang sñawbha ko leh ya ki dkhot wa thymme yong ka Club wa kynthup ya u Reuveny Nongtdu, u Dawan Biam, u Reming Pala wa u Dr. Kamwada-e Syngkon.
Kiwa klam ha kani ka sngi kynthup ki ya u kongsan Rtn. (Dr.) K.S. Elangbam, u Rtn. S.K. Lato (MPHF) President Rotary Club Jowai, ka Rtn. E.F. Gatphoh (MPHF) A.G.Zone-X 2019-20 Charter President & Club Trainers wa kiwi. Da pdiang sñiawbha leh ya ki dkhot wa thymme wei da yoh leh yei pynche ya ka thong yong kani ka Club kamjooh leh yei myntoi hawa man dkhot ha ka.
Heiyatoh won wa kiwa da yoh ya ka Award wa kynthup ya u Wyrta wa u Syllad, da e khublei wei yaroh ki yei chakri yong ka Club neibynta ki paidbah heiwa da e mynsien leh wow nang pteiñ ka Club wow leh ya ki kaam wa rap bha sam neini chaphrang.
“Kiwa thoh khubor leh man ki chibynta kiwa haphrang dooh wow yakhun ya ka khlam COVID-19, han lym wan ki hei dur ki Doctor ki Nurse næ ki wakreh yong ka chnat i chait i khiah leh, tangwa neibhah wa ki leh da hap mih hap tia ki neibynta u thooh yutip wei e khubor cha u paidbah,” da ong u Rtn. S.K.Lato.
