Jowai: Ka Rotary Club Jowai ha kani ka 2 tarik, kam chibynta i lehkmen yaka Charter Night, da e khusnam namo ka Award ya kawi ka dhab tem naka chnong Ammutong, West Jaiñtia Hills District wa ya u Saje Laloo uwa na Panaliar Jowai, haka yalang wada pynman ha Orchid Inn, Thadlaskeiñ wa tip kam ka “Charter Night Celebration and Vocational Award Ceremony”. Wei ya kini ki Award da e ya ki deiwa jied ya ki bru wa da emkti wow e ya ka chakri neibynta ka imlang sahlang.
Heiyatoh waka dhab tem kawa tip kam ka Youth Social & Music Club, man ko ka kynhun tem wada mih chakhmat lyngba i em ka thong wow pynneh pynsah yaki rukom tem rukom put tynre wada sikai nadooh uwa rim wei wow pynchlur yaki khon khynroo khyllood wow pynemkaam hok yei sap wada e u Blai.
Neitæ da man ko ka kynhun wa jooh lai chimbynta cha kiwi boon ki thaw yong ka jylla kam chei thaw wa bia, natlor i chimbynta hei tem wa chad Chtristmas wa ki lehkmmen snem thymme.
Katwa u Saje Laloo won da yoh u yaka Award hajrong ki kaam yong o wow pyrchang u yada yaka wah Myntdu kawa man ka wah wa e umbaam umdih kawa kær soodong yaka chnong Jowai, deiwa ujor mukotduma cha ka yungbichaar ka National Green Tribunal (NGT) yow pait u yoo ko hajrong i chah ktah ka wah neiwa kai ki tngit lyngba ki dooid, natlor wa pyrchang u wow yoh yada ya kiwi won ki wah hapoh ka Jylla.
Ya kini ki Award da e da u Deputy Commissioner ka West Jaiñtia Hills District uwa man leh kam u Honourary Member ka Rotary Club u Garod LSN Dykes, wei hawa e u yei klam da yaroh u ya kiwa yoh Award hajrong ki kaam wa khroo wada lai luti ki, khamtam yaka Youth Social & Music Club kawa em ka thong wow pynnneh ya iwa rim wa jah.
Da ong haroh u wa i put i tem ym kut i du haka jylla donhi tangwa lyngba i kreh chitom ye u nang ku chaphrang.
Kiwi won wa e yei klam ha kani ka sngi kynthup u Rtn. B Shilla, Assistant Governor Zone-X, Rtn. SK Lato (MPHF), Vice President, Rtn. BP Najiar (PHF), President, Rtn. EF. Gatphoh (MPHF) Charter President, Rtn. A Susngi (RFSM) Secretary wa kiwi kiwi.
Discussion about this post