Ka Seiñ Kur Dkhar Wapung Circle, ha ka 17 tarik uni u bnai da pynman ko ya ka yalang pynkup burom ha ka chnong Wapungshnong, East Jaiñtia Hills ya ki 27 ngut ki khynroo khyllood yong ka Seiñ Kur Dkhar Wapung Circle, kiwa da lehbha ha ki laiñ waphær waphær kiwa kynthup nadooh ka Formal, Professional wa ki Vocational Education. Kamjooh leh ya kiwa chakri paidbah wa ki kattu katni na ki dkhot yong ka kur Dkhar kiwa da lehbha yei kaam wa kit ki waphær waphær, kiwa e mynsien wei pynchlur ya kiwi tawon.
Yeini i pynkup burom da leh kam chibynta wow tipmit wei wow e mynsien wei pynchlur ya ki khon yong ka kur Dkhar nadooh kiwa dang puræ hadooh kiwon kiwon kiwa em lane kreh ya iwon iwon i kaam khnang wa yow lehbha wei u nang lai chooh chooh ki chakhmat.
Da pynlai ya katai ka yalang da u Shaniahskhem Dkhar, President yong ka Seiñ Kur Dkhar, Wapungskur Circle uwa da e leh yei klam waiphang yong oo ha katai ka sngi, deiwa ong u wa nadooh i por wa man u kam u President wa nyngkong yong ka Seiñ Kur Dkhar, Wapungskur Circle ka thong kawa hakhmat dooh yong oo toh wow leh iyi ræ iyi i kaam neibynta u e mynsien wei u pynchlur ya ki khon yong ka Seiñ Kur Dkhar, Wapungskur Circle, khamtam ya ki khynnah wa lai puræ puthi kiwa man ka mynried mankawi wa ki chrot yong ka kur Dkhar. Katwa u Kyrshan Dkhar, General Secretary ka Seiñ Kur Wapung Circle da e u yei klam pynap pynsñiaw kyllum iwa tbian heiyatoh wa i krehkaam yong ka Seiñ Kur Dkhar, Wapungskur Circle.
Ha katai ka sngi da ya emlang leh kiwa yakhmat waphær waphær kiwa hakhmat dooh yong ka Seiñ Kur Dkhar kiwa da wan na kylleiñ soodong yong ki chnat krehkaam yong ka Seiñ Kur Dkhar ha Ri-loom Jaiñtia.
Kiwa klam ha katai ka sngi kynthup ki nadooh u MH Dkhar, Addnl. Genl. Secy., u Justine Dkhar (Ex-MLA), Adviser, ka Rosila Dkhar, Executive Member, u Teras Dkhar, President ka Seiñ Kur Dkhar East Jaiñtia Hills District.
Da yoh leh i klam na u Kermi Dkhar, Executive Member, Seiñ Kur Dkhar Central Body wa u Jessi Dkhar, President Seiñ Kur Dkhar, Khliehtyrshi Circle kiwa da kyntu ki ya ki para kur Dkhar waroh wow em ya ka mynsien yajan, ya maya-saya, i yarap kylliang, i yatylli wei kiwa ya man kam iwi lada heiwon iwon i bynta leh, weiwa toh u man ki kiwa imbha immiat, im tipbru-tipblai, emakor-emsalon wei kiwa sñiawngooh. Da kyntu kyrpang haroh ki ya ki khon khynroo khyllood yong ka kur Dkhar khamtam ya kiwa dang em hei puræ puthi wow man ki kiwa kreh chitom, minot, nehchah, ngaitsneiñ, kiwa maya wei burom ya kiwa sikai wei ya ki bei ki pa yong ki; kamjooh leh ym hoi u randien, u boohteiñ lane u sarom lada hei puræ puthi, hei kaam i jaam wa ki kreh wa leh ki, lane ya kawon kawon ka sap ka phong kawa ki ye ki u em.
Heijooh i por leh ha katai ka sngi da thung pynskem ya ka chnat krehkaam yong ka Seiñ Kur Dkhar kawa em ha katai hi ka chnong, kawa da e pyrtuid kam ka Seiñ Kur Dkhar, Wapungshnong Unit kawa kynthup ya kiwa kitkaam yong ka kamni:
President- U Seibormi Dkhar
Vice President- U Kalat Dkhar wa u Jointly Dkhar
General Secretary- U Romi Dkhar
Asst. Genl. Secy- Ka Manti Dkhar waka Neiniwan Dkhar
Treasurer- Ka Thiangmon Dkhar
Ki Adviser- U Kyrshan Dkhar, u Yukless Dkhar, ka Pretty Dkhar waka Joplangki Dkhar wei da jied leh ya 31 ngut ki Executive Member.
Da pynbaam smai ya kiwa kitkaam wei pynskem ya katai ka chnat krehkaam da u Harwis Dkhar, President yong ka Seiñ Kur Dkhar Central Body, katwa yei e sñiawbha nadooh ka Register, ka Lama wa ki Seal da e kti kamwa jooh leh hi, da u Teras Dkhar wa u MH Dkhar, President wei Addnl. Genl. Secy. yong ka Seiñ Kur Dkhar East Jaiñtia Hills District.
Kiwi tawon kiwa e yei klam ha katai ka sngi, toh u Kerbhami Dkhar, uwa da e yei klam pdiang sñiawbha waka Chemsuk Dkhar kawa da e yei klam sñiawngooh. Pyn-ar kitai man ki ki Executive Member yong katai ka Seiñ Kur Dkhar, Wapungshnong Unit kawa thymme.
