U Montri Rangbah ka jylla, u Conrad K. Sangma ynne da pynkup burom u da ka ‘Lifetime Achievement Award’ ya uwa chna sur wa pawnaam ka jylla, u Lou Majaw heijooh i por kam chibynta wow pynchlur ya ka tem ka put deiwa sdang leh ya ka “Meghalaya Grassroots Music Project”.
Ka Meghalaya Grassroots Music Project toh kam chibynta i thong ka sorkar wow tipmit yei sap wa yatoh wa i put i tem heiwa ka sorkar u e ko ya ka rynsan wow pynyoo yei sap ha kylleiñ ka jylla kamjooh wow e laad yow lai cha baar ka jylla yow pynyoo yei sap.
U Conrad da ong u wa kani toh kawa da man leh kam chibynta ki kaam uiñke suwari hapoh ka jylla yow kynrong ya ka put ka tem hapoh ka jylla kamjooh yow pynim yei naam ka jylla kam ka ‘Rock Capital of India’, wei lyngba kani ka Grassroots Music Project daw sdang leh ya kiwa boon ki jait kaam wa yatoh wa kiwa boon ki jait sur yow khriñ ya kiwa uiñke suwari chapoh ka jylla.
“Ngait skem i wa lyngba ini, daw ye ki khynroo wow pynlut yei por yong ki wow sai yei sap yong ki ha i tem i put, i rwai i siaw,” da ong u Conrad.
Chooh chooh da ong u wa ini daw pyntikna ko wa pynkylla yei rukom pyrkhat ki khynroo kiwa kwah wow im-ja nei put i tem kamjooh yow pyn ka-it kasar ya kiwa maya sur iwa daw man leh i kaam wow pynyoh myntoi ya ki khynroo khyllood ka jylla.
