Ka Sports Social & Cultural Club Ummulong ha ka 15 tarik uni u bnai da pynman ko ya i pynkup burom ya kiwa yalehke ka chnong kiwa da wanrah yei naam jop ha ka lympung West Jaiñtia Cricket League 2024.
Ha kani ka yalang da emlang u Rilangki Siangshai kam u kongsan deilang ki waheh yong ka chnong Ummulong.
Ya ka yalang da pynlai da u Treasurer ka Sports Club, u Rangkynsai Phawa, heiwa da yoh ya ki kyntien pdiang burom na u General Secretary ka Club, u J. Langmi Bamon uwa da sneiñ ya kiwa yalehke kamjooh uwa da khana ya i thmu ka Club hawa chimbynta ko ha ki Tournament toh yow e laad ya ki khon yong ka chnong yow ye ki u sai ya ki sap yalehke yong ki.
Da yoh leh yei klam na u Marshall Pariat uwa da yaroh ya kiwa yalehke kamjooh leh ya kiwa pynlai yong ka Club kiwa da ye u em i jooh i thmu hadooh wa ye u yoh ya ka thong.
Neiliang u kongsan hawa e i klam da e u ya i sneiñ kyntu ya kiwa yalehke waroh wow man ki kiwa kreh chitom kiwa chimkhia ya ka sap ka yong ki.
Da ong u wa yow poi cha i thong, i krehchitom toh u em i hakhmat dooh deiwa kyntu u leh ya waroh wa ka Sports hi yarap ko ha kiwa boon ki liang khamtam u lait i na ki kaam wa pynsih ya idæ kamjooh leh ya ka imlang sahlang.
Ha kani ka yalang da yoh leh u saam ya ki Award waphær waphær cha kiwa yalehke kamjooh leh i e sñiawbha cha ki waheh, ki manbei kiwa da emkti lang wa ka Club naki por cha ki por khamtam ha kani ka lympung.
Khaddooh da yoh ya ki kyntien sñiawngooh na u Rejoice Gassah uwa man leh u Cricket Secretary yong ka Ummulong Sports Club uwa da e khublei kyllum ya kiwa yalehke, ki khynroo khyllood kiwa da emlang kamjooh leh ya waroh kiwa yarap kiwa jooh kyrchaan ya ka Sports Club naki por cha ki por.
Discussion about this post