Ka Society for Urban and Rural Empowerment (SURE) ha ka 25 tarik uni u bnai da pynkup burom ko ya kiwa duna hei i bor chynna ki khmat hadien wa da ye ki u pyndep yei chah sikai thaiñ saroo wa tip kam ka “Skill Handicrafts Programme on Broom Making for Visually Impaired Individuals” wa da pynman da ka SURE hi deiwa kyrchaan poisa ka Meghalaya State Skill Development Society waka District Social Welfare West Jaiñtia Hills ha ka yalang wada pynman ha Training Centre ka SURE wa em ha Newhill, Jowai.
Ha kani ka yalang pynkup burom da emlang ka D.V. Lyngdoh, MCS, Additional Deputy Commissioner, West Jaiñtia Hills kam ka kongsan, ka R. Passah, District Social Welfare Officer, West Jaiñtia Hills kam ka symbood kongsan hei emlang u L. Suchen, Skill Development Officer, West Jaiñtia wa kiwi.
Ka D.V. Lyngdoh hawa klam kam ka kongsan ong ko kani ka sngi da man kawa jop neibhah kiwa chah sikai da ye ki u pyndep ya boon ki jait sikai.
Da e khublei ko leh yaka SURE wa da chimkhia ko ha kiwa boon ki bynta wei wot neibynta ki bru wa maad yei eh i khoo i rukom im haka imlang sahlang.
Neitæ yooluti ko waka SURE u nang paitbniah chooh chooh ko ya kiwi won ki bynta yong i im ki bru wa chem jynjar.
Heijooh i por kyntu ko ya kiwi tawon wow mih ki chakhmat u chimbynta ha ki e sikai waphær waphær neibhah ha kini ki sngi man iwa saja u yoh kreh sorkar wa da boon kiwa stat wa tip, kamtæ emkaam u yieñ hei kjat yong i hi yow kreh u kamai yow ku i yoh i la.
Neiliang ka R. Passah, Distrct Social Welfare Officer hawa pynsñiaw yaki Scheme waphær wa ye u yoh yarap na ka chnat krehkaam yong ka, yaroh ko leh ya kiwa da pyndep yei chah sikai neibhah wot hapyrdi i em duna hei bor chynna ki khmat leh ye ki u kreh kam kiwa chynna khmat. Wei ini waroh toh nei kreh chitom ki.
Ha ka yalang wa pynlai da ka Aitilut Kyndait, dkhot yong ka SURE, da yoh i klam yahkhmat heiyatoh waka Skills Meghalaya na ka I. Gashnga, dkhot ka SURE, i klam na u L. Suchen, i klam na kiwa da pyndep yei chah sikai wa kynthup ya ka Durga Sari wa u Krishna Phawa.
Discussion about this post