Pynkup burom ka SWCJ ya uwa yakhun kti wa da wanrah naam ya ka Ri Jaiñtia

Ka Synjuk Waheh Chnong Jowai (SWCJ) ynne i janmiet da pynkup burom ko ya u Alexander Lyngdoh uwi na kiwa chong chnong ka Loomsooyung New Hill, Jowai uwa da yoh rah naam neibynta ka Ri Jaiñtia hei wow lai yakhun kti cha kylleiñ ki bynta hapoh ka ri India.

U Alexander Lyngdoh toh u bru wa duna ha i doh i pran, tangwa da ye u wow wanrah burom ya ka Ri Jaiñtia, neitæ won da yoh u wow lai ya chimbynta cha baar ka ri India kam uwa yakhun kti uwa da chah jied na ka jylla Meghalaya.

Ka Synjuk Waheh Chnong Jowai hadien wa da tip ko yeini na u Waheh Chnong ka Loomsooyung, New Hill dap ko dei sñiawkmen hadooh kattæ kattæ heiwa da booh ko ka rai wow pynkup burom ya u Alexander ha Community Hall ka Dorbar Chnong Dongmihsngi.

Ya ka yalang tbian da pynlai da u President ka Synjuk, u Alan Niangti wei da yoh ya i klam kyrkhu na u Jlan Kupar Rymbai, Waheh Chnong ka Loompariat, uwa man kam u Vice President ka Synjuk wei da yoh leh ya ki kyntien ngoohblai na u Waheh Chnong ka Tyndo Wapung, u Shaniah Skhem Huwa.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Hei klam yong u Waheh Chnong ka Loompariat, da pynkynmoo u ya iyi wa ka synjuk dadep ko u pynkup burom kamni, deiwa sdang na kawi ka khyllood wa da yoh u lai mihkhmat ya ka ri India cha Turkey, katæ toh ka Rupda RY Lato kam ka Rubaru Miss India Elite 2023 neitæ katni won da pynchlur chooh chooh ko sa ya u Alexander Lyngdoh uwa da yoh wow lai mihkhmat ya ka ri India ha ki sngi wa nachwa wa neibynta ki sngi wa daw wan wei da e u leh ya ki kyntien kitbok kitrwiang yow nang jop chooh chooh chaphrang ha kiwa daw yaleh u.

Neiliang ki dkhot ka synjuk waroh leh, da e khublei kitbok kitrwiang ki ya oo yow yoh u ye u rah naam chooh chooh ya ka ri hi waroh kawi.