Jowai : Ka skur Tia Chaphrang Higher Secondary School, Sohkymphor East Jaiñtia haka 17 tarik uni u bnai da pynkup burom ko ya ki khynnah wa da pass ya ka exam SSLC wa pynman da ka MBOSE.
Ya kani ka skur da seiñ nadooh u snem 2007 da u bru samen u ma Protasuis Suiam kamtæ hadien wa dap 9 snem da e kti noh u wow pynlai da ka Tia Chaphrang Educational Management Society, kat nang lai ki snem ya kani ka skur da pynku kyrdan heiwa ha u snem 2015 da pynmih sa ka class 11,12 wei kani ka skur da yoh ko leh i tipmit naka sorkar ha u snem 2015.
Ha kani ka sngi pynkup burom da wan sakhi lang ki bei ki pa yong ki khynnah skur hei emlang u ma Phasmon Dkhar MDC, JHADC kam u kongsan, u nominated MDC ma Sevenborn Tang kam u symbood kongsan, ki wa sikai, ki khynnah skur wa kiwi.
U ma Phasmon hei klam kam u kongsan da kyntu u ya ki khynnah skur waroh wow man ki kiwa tip u kheiñ kor yei por neibhah i por man i iwa kordor khamtam hei yatoh waki khynnah. Da ong u leh wa boonsien hi ki bru wapoi chakhmat toh kiwa tip u kheiñ kor yei por.
Kiwi won wa e yei klam kynthup ki ya u Chairman ka Tia Chaphrang Educational Management Society u ma Protasuis Suiam, u Principal ka K.B.Memorial School Wapung, u waheh chnong, u Secretary ka Sohkymphor Mission u ma K.Lapasam wa u W.Langstang wa kiwi.
Da yoh leh i klam na ki khynnah wa chah pynkup burom, ki wa sikai, i rwai kyrpang na ka Choir ka Wapung Presbyterian.
Ya i pynkup burom da chimkti da u kongsan, symbood kongsan kamjooh ki wa sikai deiwa saam ya ki Certificate cha ki 32 ngut kiwa pass na ki 33 ngut kiwa yakhun 1st division 3 ngut, 2nd division 27 ngut 3rd division won 3 ngut.
Da pynchong chit chooh chooh ya kani ka sngi dei chaad i rwai ka drama kamjooh ka fancy dress hei riam yong ki jaitbru waphær waphær.
Discussion about this post