Ka Women’s Welfare Organisation, Seiñraij Jowai ynne ka 5 tarik da pynman ko ya ka sngi yachemlang ki khon kynthai ha Yungwalieh ka Loompyrdi Iongpiah heiwa u Wailadmiki Shylla, MLA Jowai Constituency daman u kam u kongsan katwa u A. Andrew Shullai, MDC-Jowai Central daman u kam u symbood kongsan hei emlang u Dolloi ka Elaka Jowai, u Wh. Puramon Kynjing wa kiwi ki waheh wasian ka Seiñraij.
Ha ka yalang yong kani ka sngi hei pynlai ka Hima Lakiang, Chairperson WWO, Seinraij da yoh i ngoohblai ngoohsyiem na ka Rilistina Pyrbot, Member WWO-SRJ, u Arwotki Sumer, General Secretary, Seinraij Jowai da pachat u ya ki kyntien sneiñ kyntien kroo ya ki khon khynroo khyllood kiwa da pynkup burom ha kani ka sngi katwa ka Hunbaitki Dkhar, Secretary WWO-SRJ hawa kut e ko ki kyntien sñiawngooh.
U A. Andrew Shullai hawa e kyntien kam u symbood kongsan da e mynsien u ya ki khon khynroo khyllood deiwa ong, kynmoo kani ka juk ymtoh de kawa man da stat u yooluti bait i ya ki kaam sorkar neitæ ong u leh najrong wa man kiwa stat emkaam leh u man ki bru wa em i sap wei chemphang neitæ kiwa ye leh u pynyatoh wa kiwi.
Neiliang u Wailadmiki Shylla kam u kongsan yong kani ka sngi hawa klam da yaroh u ya ki dkhot ka Women’s Welfare Organisation, Seinraij kiwa da kreh yei kaam neibynta ka imlang sahlang wot hapyrdi i em ki ka yukit wa khia kam ka Kchuu ka Siang.
E mynsien u ya ki khon khynroo khyllood ka Niamtre kiwa da pynkup burom ha kani ka sngi deiwa ong, kut yumut wow yoh chooh ya ka Percentage wa heh wei manda em phi ha ki kyrdan waphær næ yoh yei stat i tip pyrthai ham myllin lyndet yei iong-i dahi i tre i thied wei pynkhroo dei yong kiwi.
Chooh chooh u Wailadmiki Shylla kam ka dak i yarap yachaan ya ka Women’s Welfare Organisation, Seinraij da e kyllooid mynsien u leh cha ka yarong ka seiñ da ka muhor ka kynthiar wa T. 1 lak.
Ini i pynkup burom ka Women’s Welfare Organisation- Seiñraij Jowai toh kyrpang ya ki khon khynroo khyllood kiwa yoh 80% chaneiñ ha ka HSSLC wa ka SSLC katwa 70% chaneiñ won ya kiwa ye u pyndep ya ka Degree Level ha ki laiñ puræ waphær.
Ki le ngut ki khon khynroo khyllood ka Niamtre kiwa da yoh ya ka Topper ha uni u snem toh ka Hakacheini Passah na Loomiongkjam kawa da pyndep ya ka HSSLC Examination 2021 deiwa yoh 88.8% deilang ka Distinction ha ka Khasi, Chemistry, Biology, Maths wa ka Physics, u Roderick Passah na Dulong wa da pyndep ya ka SSLC Examination 2022 deiwa yoh 90.50% deilang ka Distinction ha ka English, Additional English, Science & Technology, Social Science, Mathematics wa ka Physical & Health Education wa ka Arwaka Lamurong na Dulong kawa da pyndep ya ka SSLC Examination 2021 deiwa yoh 87.83% deilang ka Distinction ha ka English, Mathematics, Science & Technology, Social Science, Health Education wa ka Khasi.
