Ka Women’s Welfare Organisation Seiñraij Jowai kamwa jooh man khlieh-u-snem ha ka sngi Musiang ka 28 tarik leh da pynman ko ya i yachemlang wa kyrpang ki khon kynthai wei da em leh i pynkup burom ya ki khon khynroo khyllood ka Niamtre kiwa da pyndep yei kyrdan PhD wa kamjooh leh ya kitu kiwa yoh 80% chaneiñ hei puræ puthi yong i kyrdan SSLC wa HSSLC.
Ha ka yalang yong kani ka sngi hei pynlai ka khyllood Dathrang I Passah wa u khynroo Salanda-O Langdoh, ka Wandalan Dkhar, Chairperson WWO Seiñraij Jowai da e ko ki kyntien pdiang burom neitæ ka Ridaka Lamar, Vice-Chairperson WWO Seiñraij Jowai da siang ko wow e ki kyntien ngooh Blai ngooh Syiem katwa hei pynkut won ka Hunbeitki Dkhar, Secretary WWO Seiñraij Jowai da pachat ko ki kyntien khublei.
Ya kani ka yalang da wan sakhilang da ka Bandarisha Lyndem, Chief Engineer PHE ka sorkar Meghalaya kam ka kongsan chirup u Antonio Lakiang, Deputy Secretary u Governor ka Meghalaya kam u symbood kongsan, u Hercules Toi, President Seiñraij Jowai, u Arwotki Sumer, General Secretary, Seiñraij Jowai wa ki waheh wasian, manbei manpa wa ki khynroo khyllood ka Seiñraij Jowai.
U Hercules Toi hawa e kyntien ha kani ka sngi da kdar kyrpang u wow khana pynsñiaw chaphang ka National Education Policy 2020 wei da ong u leh i ye u pynkrehkaam ya kani ka Policy hapoh ka jylla man i myntoi wa khroo nadooh ki khynnah wa puræ ha ki Class khian hadooh kitu kiwa puræ ha ki kyrdan wa heh dooh.
U Antonio Lakiang won hei klam i kappæ yong oo, e mynsien u ya ki khon khynroo khyllood deiwa ong booh ka thong wei thrang i angnood hei man i sñiaw yong phi samen samen neibhah iyi iwa kwah phi u yoh, iyi iwa kwah phi u leh toh phi donhi kiwa tip wa sñiawthooh yeiwa ye næ ym ye phi u leh yeitæ, ymhoi u ap phi yeiwa ong kiwi.
Ki khon khynroo khyllood ka Niamtre kiwa yoh yeini i burom ha uni u snem em ki 11 ngut ha ka SSLC, 3 ngut ha ka HSSLC wa 2 ngut won kiwa yoh yei kyrdan Doctorate wei yeini i pynkup burom ha kani ka sngi da pyndep da ka kongsan, u symbood kongsan, u President, u General Secretary wa kiwa ksoh kaam ka Seiñraij, Jowai.
Napyrdi kini kiwa boon, ar ngut toh kiwa da yoh yei kyrdan Seiñraij Topper, kitæ ka Mayanka Pde na dong Salini Mihmyntdu kawa puræ ha Jowai Govt. Public School wei da pyndep ko ya ka ICSE Examination 2023 deiwa yoh hadooh 94.3% wa 5 tylli ki Distinction wa kynthup ya ka English, Khasi, Social Science, Mathematics, Science & Home Science katwa uwi won toh u khynroo Wansame Pakyntein wa puræ ha Sri. Chaitanya Junior Kala Sale Pragathi Nagar, Hyderabad dei wa yoh 90.21% wei da yoh Distinction ha ki soo tylli ki Subject wa kynthup yaka English, French, Zoology waka Botony.
Chooh chooh ha kani ka sien yachemlang ki khon kynthai ka Seiñraij da em leh i pynkup burom wa rap kyrpang ya ki ar ngut ki khon ka Niamtre kiwa yoh yei kyrdan Doctorate kitæ toh u Dr. Lincoln Dkhar na dong Chilliangraij wa man u khon ka Delta Dkhar wa u Tynrawde u Frando Sungoh. U Dr. Lincoln da pyndep u yei puræ Ph.D ha ka Subject Chemistry na NEHU, Shillong ha u snem 2023 neitæ kawi an toh ka Dr. Toba Lamare na Ummulong wa man ka khon yong ka Lukhimai Lamare wa u Tynrawde u Lemison Lyngdoh, ka Dr. Toba da pyndep ko ya ka Ph.D ha ka Subject Education na NEHU, Shillong ha u snem 2017.
Ka Badarisha Lyndem kam ka kongsan yong kani ka sngi da e mysien ko ya ki khon khynroo khyllood wow kreh chitom chooh chooh deilang wei wow tip u bood u ksoh ya ki adong niam adong Blai khnang wa i burom i naam wa khroo yong ka yung ka sem, ka chnong ka thaw u yoh chooh ki u rah hakhmat ka pyrthai.
Ya kani ka sngi yachemlang ki khon kynthai ka Seinraij da pynphooh pynphieñ wei pynka’it leh ya kiwa wan sakhi da ki chaad ki rwai wa da chimbynta da ki khon khynroo khyllood ka Seiñraij, ki manbei ka Loompyrdi Iongpiah wa ki khon khynroo khyllood ka Umchangiar.
Discussion about this post