Ka All Jaiñtia Muster Roll Workers & Labour Union, Thadlaskeiñ C&RD Block ha ka 5 tarik uni u bnai da pynkup burom ko ya u Khroo L Pariat, uwa man uwa e buit e bor ya kiwa kreh nongsngi ha ki chnat ka sorkar jylla ha Ri-loom Jaiñtia, ha ka yalang dap 4 snem i krehkaam ka chnat ha Thadlaskeiñ.
Ha kani ka yalang da wan ya chimbynta chongchit hadooh kamwa 300 tam ki wakreh nongsngi (Muster Roll) ha ki chnat waphær waphær ka sorkar Meghalaya wa haap ha Thadlaskeiñ C&RD block.
Ya kani ka yalang da pynlai da ka Mary Shangpung, Treasurer, AJMW&LU Thadlaskeiñ Block heiwa u kongsan ha kani ka yalang pynemburom lyngkhooh dap snem toh u Fourme Dhar, uwa kreh mon sñiawbha yow kyntu kynrong ya i bha i miat ka thaaiñ kamjooh u warep, uwa kreh mistri heiwa da sneiñ u ya waroh kiwa kreh mylla wym toh u mylliñ ki yei por wa dang dooh ki manda biang da chngaaiñ i im. Ym hoi u pynchlur u e khih ya ki baar ri kiwa khih nongsngi ha i dor wa toh dooh tang yow yoh ki u im ha kini ki loom ki pdeiñ wa pynim ya i kam ki tre ri.
U Leo Laloo, Waheh Chnong ka Dorbar Chnong Ummulong da man u uwa klam kyrpang uwa da pachat ya ki kyntien symboh ksiar wa kam kiwa kreh nongsngi ha ka sorkar toh u man ki kiwa yatylli kiwa ya krehlang khamtam ha ki kaam yap kam im wei wow dawa yei hok na ka sorkar chirup wa kiwa yahkhmat ya ka seiñ, wym hoi u man ki kiwa hun u yang u kreh u yakhih da kiwi neibynta i yong ki i hok.
Da yoh leh yei klam na ka Dayoowanphi Iakai, President ka AJMW&LU (seiñbei), kawa da khana ya ki kaam wa da dep yarap dep kreh u Khroo L Pariat ha ki snem wa da lai nadooh i yaleh u pynbha ya ka rukom krehkaam ka MPSC yow yoh hok kiwa yaleh kreh sorkar hadooh i yaleh cha High Court Meghalaya yow yoh yung rieh tngen kiwa im cha madan cha surok khamtam ya ka wah Myntdu wa i pynbha ya ka umkor wa saam cha ki yung na ka PHE Jowai, i yarap ya ki warep, i yakhun yow pynku yei nong kiwa chet-ja sngi ha ki skur namo ki Mid Day Meal Cook deilang wa kiwa yarap ya ki namo ki Helper, wa kiwi tawon ki kaam wa kyntu kynrong ya ka imlang sahlang khamtam ya kiwa duna wa tymbuiñ.
Ha ka 7 tarik won, da pynkup burom ya u Khroo L Pariat sa ki Cook cum Helper PM POSHAN yong ka Ri- Bhoi ha ka yalang wa da pynman ha St. Paul Parish, Nongpoh.
Ha kani ka pynkupburom, u Mayralborn Syiem, MLA ka Nongpoh da man u kam u symbood kongsan wei da e u i yaroh ya u Khroo L Pariat uwa chynrang hei mynsien u yahkhmat ya kiwa chet-ja skur kiwa man kam ki wakreh wa duna tam i su ha ka jylla, hadooh wa ka sorkar lyngba ka chnat puræ puthi ka jylla da mynjur ko u pynku ya ka nong namo ka Honorarium kawa daw pynchngaaiñ yei im yong ki phaw hajar ngut kiwa chet-ja ha jylla. Da e yumut u ya waroh kiwa chet-ja yow ya ryntih ki kam ki thied, ki chnat yow skem u dieñbah, u mih syntu mih soh ha ki por wa daw wan.
Neiliang u Khroo L Pariat da kyntu u ya kiwa chet-ja ha waroh ka jylla Meghalaya yow pait ki yei im yong ki sam chakhmat, wow klam ki ya iwa sakhiat wei wym toh u chah u synchaar ka poisa ya ki wa u nangkhlan chooh choh yei krehkaam kiwa chet-ja. Khamtam yow ya ryntih ki ha ki sngi kiwa daw wan hadooh wa u Prime Minister ka ri, u Narendra Modi u pynku u ya ka Honorarium na ka bhah ka sorkar pyrdi nadooh u April 2023.
Da kyntu u ya waroh ki waheh chnong yow yarap ki u pynyoh Ration Card salonsar na ka chnat Supply ka sorkar cha waroh kiwa kreh mylla sngi, ki warep, kiwa duna wa tymbuiñ ha ka chnong ka dong.
