Jowai: Ka All Jaiñtia Muster Roll Worker & Labour Union, Amlarem Civil Sub Division Unit, da pynman ko ya ka dorbar pynkup burom ya u K.L. Pariat President, ka D. Ïakai, ya u Titos S Shadap Vice President, ya ka Manda Bareh General Secretary wa ya u S. Dkhar Assistant General Secretary wa ya ka L. Kyndiah ka Treasurer kiwa man kiwa yahkhmat ya ka seiñbei (CEC) hapoh ri-loom Jaiñtia.
Ya kani ka dorbar pynkup burom da pynman ha ka 20 tarik uni u bnai ha Enowell Pohshna Hall, Amlarem. Ya ka yalang da pyllai da u Valensing Pohkhyrnu uwa man u President ka chnat ha i ya emlang u Medhi Mukhim, Vice Preisident, u Tongper, General Secretary, ka Pynskem Nongpluh Treasurer ka seiñ, u O. Pariat President, ka N. Toi, General Secretary ka All Jaiñtia MDM Workers Union, kiwa kreh MDM Cook wa kiwi kiwi tawan ki dkhot ka Executive Committee ka chnat ka seiñ ha Amlarem Civil Sub Division.
Ha kani ka yalang da yoh yei klam na ka Banaras Dhar, General Secretary ka seiñ chnat East Jaiñtia Hills District, na ka Mary Shangpung Treasurer ka seiñ na ka chnat Thadlaskeiñ C&RD Block kamjooh na u Titos S Shadap Vice President ka seiñbei kiwa da khana ya ki kaam kiwa da yaleh ka seiñ wei da pynsñiaw ki ya i sñiawngooh ya ka sorkar jylla hapoh i yakhmat u Conrad Sangma kam u Chief Minister wa u Prestone Tynsong, Deputy Chief Minister wa ya waroh ki montri ki yong oo, wa ya u D. P Wahlang, Principal Secretary ka chnat Labour, u B. Mawlong Labour Commissioner wa khamtam ya u K.L. Pariat u President ka seiñbei uwa da yahkhmat ha kani ka yaleh kamjooh ya kiwi ki dkhot kiwa kitkaam kiwa da pyllut por wow yaichah hadooh wow yoh ki wakreh Muster Roll ya ka poisa wa pynku nong ka sorkar jylla.
Ha kani ka sngi ki wakreh Muster Roll na waroh ki chnat sorkar jylla kiwa em hapoh u pood u ang ka Amlarem Civil Sub-Division da ya wan pynkup burom ki ha i yahkhmat ka Pynskem Nongpluh, Treasurer ya u K.L. Pariat, heiwa ki manbei da pynkup burom ki da ka Ryndia Tlem wa kiwi kiwi ki e sñiawbha ya oo, kam ka dak wa sñiaw burom ya iwa da yaleh chitom ki wow yahkhmat ya ki wakreh Muster Roll kat hadooh wa ka sorkar Meghalaya da pynku ki yaka bai nongsngi yong ki wakreh Muster Roll na ka T.196 cha ka T. 300 chi sngi ya ki Unskilled, T. 340 ya kiwa Semi-Skilled, T. 380 ya ki Skilled Labourer wa T. 420 ya ki Highly Skilled. Nalor ini wa da e ka sorkar jylla, neiliang ka seiñ hapoh i yahkhmat u K.L. Pariat wa kiwa kitkaam ka seiñ, ki wakreh Muster Roll kiwa man ki dkhot ha ka MB&OCWB ka chnat Labour da su ko ya ka Education Scholarship cha ki khon kiwa man dkhot ha ka Board, kamjooh kiwa ha yung ki wakreh Muster Roll kiwa man ki dkhot ha ka Board, kiwa da khlaad na pyrthai da yoh ki ya ka poisa kawa T. 2 lak.
Da yoh leh ya i klam na u President ka seiñ u Ma K.L. Pariat uwa da e khublei ya ka sorkar Meghalaya kawa da yahkhmat da u Conrad Sangma wa u P. Tynsong wa ya kiwi ki montri, ki sahep ka chnat Labour ka sorkar jylla wa em ki i kitkhlieh ya kiwa tymbuiñ wa duna, kiwa man leh kiwa chakri paidbah kiwa khian tam ya ka sorkar jylla, wei yooluti u wa ha kini ki sngi kiwa daw wan u e hukum ka sorkar yow pynkrehkaam sa ya u snem wow chongngiah, ki sngi u chongsngi ki wakreh Muster Roll hawa kjut wa chitom, wa yoh khon wa sa kiwi kiwi tawon ki dawa ka seiñ.
Da ong u leh wa kani ka yaleh waroh toh du neidaw wa yatoh wa ya sñiawthooh yumut ki wakreh Muster Roll da pynman ko ya ka sorkar jylla wow e ya iwa da paan ka seiñ. Da yooluti u wa kani ka mynsien kawa em ha ki wakreh Muster Roll u man ko ka nongmuna ya ki paidbah ka jylla Meghalaya wa ya ki khon ka ri Jaiñtia waroh kawi yow bood luti ki.
Ha kani ka yalang pynkupburom neiliang ka chnat ka seiñ Amlarem da saam lang ki ya ki tre dieñ kamwa 200 tylli.
Discussion about this post