Ka khusnaam wa tip kam ka Rotary Vocational Excellence Award 2021- 2022 da saam ya ka ynne ka sngi da u Lat ka Meghalaya, u Satya Pal Malik cha u Hockey Kharumnuid yow tipmit yei chakri u deiwa kreh monsñiawbha (Voluntary Service) la 30 snem yow pynbait yei lai i wan ki kari (Traffic) ha Mawlai Stand Bus.
Da pynkup burom leh ya u Nicholas J Kharnami yei kreh u yow pynman ya ka Meghalaya kawa khooid kawa yirngam.
Da pynkup burom leh ya u Dr. Bhaskar Borgohain yei leh bha u hei sumaar sukhær ha ki thaw sumaar ka sorkar.
Da pynkup burom leh ya ka Shidalin Marbaniang kawa da seiñ khih ha Meghalaya yow pynchna ya ki Sanitary Napkin.
Ya kani ka yalang pynkup burom da leh da ka Rotary Club of Orchid City Shillong ynne ka sngi ha Durbar Hall, Raj Bhavan, Shillong.
Hawa e yei klam, u Satya Pal Malik da ong u wa ya ka Rotary da tip ha kylleiñ ka pyrthai yeiwa chakri ko ya ka imlang sahlang khamtam ya kitu kiwa tlot. Ki dkhot ka Rotary da tip yei mynsien yong ki wow chakri ya ka imlang sahlang, wei yeini da sakhi yei kreh ki wow pyndooh jait yei kjut Polio, i e yarap hawa pynyoo bor ka rymaw wa ha kiwi de ki kaam wa yatoh waka puræ puthi, i chait i khiah, i khooid i jngiar, i pynkup bor ya ki kynthai, i pynyoh umdih da kawa miat wa bha, i wanrah yei suk i saaiñ, ki pynsñiawthooh paidbah wei ya ini waroh toh hap u yaroh ya ki. Da ong u leh wa ya ini i jooh ye wow ong neibynta ka Rotary Club Orchid City Shillong kawa da kreh neibynta ini nadooh u snem 2003 wa sdang ya ka deiwa leh ya ki kaam chakri bru ha kylleiñ soodong ka sor Shillong.
Hawa e khublei ya waroh kiwa yoh khusnaam, u Lat da kyrmen u wa ini i tipmit wa da yoh ki daw pynchlur chooh chooh ko ya ki wow leh chooh chooh yei kaam wa bha yong ki.
