Jowai: Ka Dorbar Chnong Dongmihsngi ynne ka sngi da pynkup burom ko ya u khon ka Chnong u Ferdinand Suchiang uwa da wanrah burom ya ka ri waka jaitbru deiwa yoh takma ksiar ha ka lympung yakhun Jeet Kune Do ha ka lympung yalehke wa tip kam ka International Martial Arts Meet 2017 wa dang dep pynman ha Hong Kong ha uni u bnai.
Ha ka yalang wa pynman ha ka Hall ka chnong da emlang ka Seiñ Khynroo, ka Seiñ Manbei, u Secretary Chnong wa kiwa chong ka chnong wei da pyllai da u Chairman u Pynchemiki Lakiang.
Neiliang u Secretary ka chnong u D. P. Laloo da ong u wa daw thooh laad wei daw paan yarap leh na ka sorkar yow pynbiang ko ya ki tiar ki tar wa emkaam wow pynbniah yei sap ki khynroo khyllood kamjooh leh wow yarap poisa heipor lai chimbynta ki ha ki Tournament waphær waphær.
Ka H. Passah kawa klam neibynta ka Seiñ Manbei da ong ko wa khlem em i yarap wa i kyrchaan naka yung ka sem ym poi u Ferdinand chadooh kani ka kyrdan.
U Secretary ka Seiñ Khynroo u G. Pohshna won da ong u wa ki kaam Sports katni da man ko ka laad im ja ya kiwa boon hapoh ka jylla kamtæ ya kiwa em yei sap toh ymhoi u sepai i wei ka sorkar emkaam ko u chim khia ko ya ini.
U Ferdinand hei klam yong oo da ong u wa da sdang u pyrchang ya ka Martial Arts nadooh u snem 1998 wei da chem u ya kiwa boon ki moo chynthut tangwa da raikut u wym ran dien u yow poi cha ka thong wei da kyntu u leh ya ka Dorbar Chnong wow pynchlur leh ya kiwi kiwa em sap ha ki yalehke wa boon rukom.
Ka Dorbar Chnong da pynkup burom ko ya u Ferdinand deiwa e ko ya ka Memento, Certificate wa ka song poisa.
Discussion about this post