Ynne ka sngi kiwa khih mooyong ka East Jaiñtia Hills District da pynkup burom ki ya u Montri Rangbah ka jylla, u Conrad K Sangma ha ka yalang wa da pynman ha Khliehriat West.
Neiliang u Balios Swer uwa man u President warim ka East Jaiñtia Coal Miners and Dealers Association da ong u wa kani ka sngi man ko kawa tyrchaaiñ wa da yoh ya ki Mining Lease hadien wa da chah khang ha ka NGT wow tih Mooyong ha jylla nadooh u snem 2014.
Da khana u leh ya i lai luti yong ki heiwa da poi chadooh cha ka kasari heiyatoh wa ini i kaam.
Ka MLA ka Sutnga Saipung Constituency, ka Santa Mary Shylla hawa e yei klam da ong ko wa nadooh wa khang mooyong da boon ki bru wa da chah ktah khamtam kiwa phah puræ khon cha baar.
Da ong ko wa du neidaw wa kreh chitom u Montri Rangbah da yoh ya ka Mining Lease heiwa u ye u tih biang ya u mooyong deiwa bood ya ki kyndon ka sorkar katkam ka juk wa katni.
Chooh chooh da ong ko wa nei sangeh yei khih mooyong da sikai i ya i ki bru waroh deiwa yooluti wa kiwi ki bru leh daw yoh ki ya kani ka Mining Lease.
U Nehlang Lyngdoh uwa man u tre thaw yong ka Mining Lease da ong u wa nadooh u 2014 da boon ki khynnah kiwa da chah ktah u pyndep yei puræ yong ki.
Da ong u wa nadooh katni emkaam wow pynlang ya ka poisa ymtoh wow man kiwa pynlut-phut kiwa leh pahooh ya ka poisa.
Uwi na kiwa yoh ya ka License, u Leborlang Lyngdoh, da pynsñiaw u yei kmen deiwa ong, “Nga dap O dei sñiawngooh ya ka sorkar jylla hapoh i yahkhmat wa i stat yong u Montri Rangbah wa em burom, u Conrad K Sangma, uwa da kreh chitom wow pynmankaam yei thrang yong i, nga kyrmen O wa kiwi kiwi ki kaam u lai bait ki wei u kreh chitom i yow poi cha ka thong.”
Neiliang u Conrad Sangma da ong u wa ka sorkar jylla da pyrchang ko katwa ye yow wanrah biang yei tih mooyong ha ka jylla da ka rukom stat sayan namo ka Scientific Mining, wei da kyrmen u wow yoo yei kylla wa bha ha kani ka kaam tih mooyong.
“Da man ko iwa eh ya kiwa chong chnong wa da hap maad ki, iwa da pynchlur ya i wow kreh chitom yow pyndooh ya ini i khang tih mooyong. I dang ya ka Scientific Mining daw yarap ko ya kiwa chong chnong ka jylla wow yoh nong na ki mar pohkhyndaw. Ka Scientific Mining ym du wow pynyoh nong ko ya ki bru tangwa daw pynduna ko yei chah pynsih ka rymaw, wei daw e kreh ko ya ki hajar ngut ki khynroo wa thooh kreh hapoh ka jylla wei ka yoh ka kot ha ka jylla leh daw ku ha ki snem wow wan,” da ogn u Conrad.
Chooh chooh da kular u wa i e License tih mooyong leh dang lai ko chakhmat.
Kiwi kiwa da klam ha kani ka sngi kynthup ki ya u Sniawbhalang Dhar, Montri sorkar, u DC ka East Jaiñtia Hills, u Abhilash Bharanwal, u E. Kharmalki uwa man u Secretary ka chnat Mining & Geology wa kiwi de nadooh ki tre dukan wa kiwa chong chong kiwa da khana yei eh wa da maad ki nadooh wa khang yei tih mooyong.
Kam wow pynkynmoo wa ka Ministry of Coal da e ko ya ka License wow tih mooyong ya 4 ngut na ki 17 ngut kiwa da yaleh wei i tih mooyong u sdang biang i hapoh ka jylla hadien 9 snem.
Ha kani ka sngi da pynyoo leh ya i Video heiyatoh wa i tih mooyong, wei da pynphooh da ki rwai wa ki chaad.
