Pynkut ka Congress yei krehkaam ki 12 tylli ki Block wa kiwa kyrchaan ya ki MLA wa yut

Ka Congress Legislature Party (CLP) hapoh i yahkhmat ka Dr. Mazel Ampareen Lyngdoh da yachem nyngkong ki ynne ka sngi, hadien wa mih noh ki 12 ngut ki MLA ka Party wow lai psiah cha ka All India Trinamool Congress.

Ka Dr. Ampareen hawa klam cha ki laad pathai khubor da pyntip ko wa ka CLP da chim ko ya i rai wow ujor biang deiwa e dei thoh cha u Chongknor ka yung dorbar Meghalaya Legislative Assembly sa ya ar ngut ki MLA wa yut seiñ, neibhah hawa nyngkong da phah ya ka ujor du ya ki 10 ngut ki MLA. Da pyntip ko wa ka CLP da rai ko wow ujor pychah ya u Charles Pyngrope wa ya u Shitlang Pale ha ka 10 tarik uni u bnai.

Hawa kylli yei wym em ujor lang ya waroh heijooh i, ka Ampareen da ong ko wa ini man ko kam chibynta i buit krehkaam hajrong katai ka phang, wei da pyntip ko leh wa katkam wa tip ka Party wa kitai ki 2 ngut ki MLA toh kiwa da chim rai khaddooh wow lai cha ka AITC deilang wa kiwi de.

Da ong ko wa ka Congress ka em ko katni 5 ngut ki MLA wei toh kiwa yahkhmat wa khlan, deiwa pynrap wa ka CLP da rai ko wow pynkhlan neini chakhmat ya ka Party wei daw sai leh ya kiwa yahkhmat ki wow man kam kiwa mihkhmat wa thymme ki wow tei ya ka jylla ha i chakri paidbah, khlem da kheiñ ya ki kynthai næ chynrang, tangwa daw sai ya kiwa yahkhmat kiwa em kyrmen wow wanrah yei jop wot lada toh da ki kynthai.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Heijooh i por ka Dr. Ampareen da ong ko wa ka CLP da rai ko wow pynkut noh chwa ya ki 12 tylli ki Block Committee yong ka Congress hadien wa da mih noh ki 12 ngut ki MLA, wei da kyrpaad leh ya kiwa yahkhmat ka Party yow e kyrchaan ya iyi wa ka Party ka leh ko, neibynta wow pynkhlan biang ya ka Party. Da ong wa i pynkut ya ki Block Congress ha ki 12 tylli ki Constituency, ya ki bru kiwa kyrchaan ya ki MLA wa yut seiñ leh daw pyndam noh yei kaam wa ksoh ki.

Hawa yatoh wa ka National Student’s Union of India (NSUI), ka Dr. Ampareen da pyntip ko wa ka CLP da rai ko wow phah pynsangeh chwa ya i krehkaam yong ka NSUI ha ka jylla, heiwa da ong wa ya ka NSUI da pynlai ya ka na Delhi wei hawa yoo wa em i khih syndet ki 12 ngut ki MLA ka Party da sñiaw wow phah sangeh chwa yei krehkaam ka NSUI heini neibhah ym kwah wa na kani leh daw ktah ya ka saiñhima yong ka Congress ha ka jylla.