Ka Pt. Deen Dayal Upadhyay Community College (DDUCC) for Skill Development, Wahiajer kawa man ka chnat puræ yong ka North-Eastern Hills University (NEHU) ha ka 18 tarik uni u bnai da pynkut ko ya ka e sikai “Plumbing” wa yatoh neibynta u pynpoor u pyndait ki Pipe umkor ha ki yung ki sem wa kiwi de ki thaw.
Ya kani ka e sikai da pynman ha ki 6 sngi nadooh ka 11 tarik hadooh 18 tarik uni u bnai, wei da wan chimbynta da ki khynroo na ki chnong waphær waphær na kylleiñ ka Ri-loom Jaiñtia.
Ha kini ki ynru sngi kiwa chimbynta da yoh ki yei tip i chemphang na kiwa sikai ya ki, la heiyatoh i rukom siang, i pynpoor, i rukom pyndait ya ki Pipe um ha kawon kawon ka thaw la ha ki yung ki sem ki bru, ki yung krehkaam sorkar wa kiwi, najrong wa kammon u pynbha pynpliah chooh chooh ki yeiwa da tip chwa.
Ha kani ka sngi pynkut ya kani ka e sikai da emlang u Latu Nartiang, Branch Manager, Meghalaya Co-op. Apex Bank Ltd. Ummulong Branch kam u kongsan, heiwa da chim u leh ka laad wow batai heiyatoh i yarap ya ki paidbah wa ye ki u yoh na ka MCAB, deiwa emlang u Pyndapmi Dkhar, u dkhot ka chnong Wahiajer kam u symbood kongsan.
Hawa e yei klam kini ki waheh da yaroh ki yei em kam kani ka thaw e sikai ya ki khon khynroo khyllood, kawa pynchlur ya ki wow kreh ya kiwon kiwon ki kaam wa da yoh sikai wa kynthup ha ka kaam Plumbing. Neibhah deiwa pynpliah yei sap ye leh u pynneh yei khih i kamai wei ye u yieñ hei kjat yong ki hi.
Kiwi won wa klam kynthup ya ka Prof. (Mrs) S.M. Sungoh, Principal I/c, DDUCC wa u Prof. H. Lamin, (Retd) Founder Principal I/c, DDUCC.
Da ong haroh ki wa kani ka e sikai man ko chibynta i e kti wa rap yillu yong ka DDUCC/NEHU neibynta u pynku yei tip i stat i roi i paar ha ki bynta waphær waphær kam chibynta ka NEP 2020, kawa man leh katkam i thmu yong u (L) Pandit Deen Dayal Upadhyay.
Da pynkut yaka yalang deiwa saam Certificate cha kiwa chimbynta wei klam e khublei na Wolnish Rymbai kam u Programme Co-ordinator.
Discussion about this post