Ka Dong Umsyiem Bataw, da pynkut ko yaka lehkmen Crystal Jubilee namo ka lyngkhooh dap 15 snem (2006-2021) kawa da pynhaap pyrda haka 17 tarik uni u bnai heiwa da pynman leh yaka Football Friendly Match hapyrdi ka Umsyiem FC pyrchah yaka Umstyndong SCSC.
Ka yaleh man ko kawa ya thain bha heiwa hadooh wa kut i por da yoh wow thap mar 2 kool.
Hawa kut, u Referee da rai u wow pynyachut daka Tie-breaker, heiwa ka Umsyiem FC da rah ko yei jop da 5-4.
U Secretary ka Dong da puræ u leh yaka parom wa tbian heiyatoh wa ki kaam wa i lai luti ka Dong wa da thoh da u JR Rupsi.
U kongsan ha kani ka sngi u toh u Waheh Chnong Bataw, u BL Suchiang uwa da e yei klam wow kyrkhu kyrdoh yaka Dong, deiwa kitbok kitrwiang yaki kaam wa bha wada leh ko hakini ki 15 tylli ki snem wa da lai deiwa ong wa ini pynyoo ko leh ya kiwi ki Dong wow bood nongmuna ki khnang wow ye ki wow lehbha lehmiat haki kaam wa bha ka Dong.
Da yoh leh i klam maitphang wei ngooh Blai na u S. Sumer. Kiwi kiwa e yei klam wow yaroh yaka Dong toh u H. Pajat, u P. Lahong wa u A. Rupsi.
Da pynhiar yaka Lama Dong kam ka dak wow pynkut da u C. Masa.
Ini toh i pyntip na u Chairman u JR Rupsi.
