Ka mukotduma PIL kawa da yaleh da u Sengbreezbirth N Marak pyrchah yaka sorkar jylla yow dawa pyndam thung kreh ya kitu wym em pyndep yaka Meghalaya Teachers Eligibility Test (MTET) wei wow bood yeiwa da pynbna namo ka Notification wa da pynmih da ka NCTE haka 23-08-2010 deilang waka Notification wa da pynmih haka 01-07-2020 da ka Education Department ka sorkar Meghalaya, da pynkut noh ka da ka Meghalaya High Court ynnin ka sngi.
Uwa yaleh mukotduma da ong u wa kiwa sikai toh u biang kyrdan ki yow yoh ki khynnah yei hikai wa biang wei man ko leh kam chibynta ka aiñ Right of Children to Free and Compulsory Education Act, 2009 neibynta ki khynnah wa em nadooh 6 snem hadooh 14 snem ha India wow yoh yei lai skur dei mynkna deilang wa i hok wa da e hapoh ka Article 21A ka Constitution ka ri heijooh i por yow pynku yei puræ puthi hapoh ka jylla.
Da ong u leh wa kani ka aiñ da kdaw ko yei puræ puthi wa toh u pyndep kiwa sikai wei lada ym biang i puræ puthi ki, ymtoh u yoh kreh ki. Kamtæ ka sorkar jylla da booh ko ka tarik wa khaddooh wow thung kreh ya kitu ki wym em MTET itæ hadooh ka 23-08-2010 wei hadien ini ym chah de wow thung kreh ya kiwa sikai skur kiwa khlem em yaka MTET.
Neiliang ka sorkar hawa jubab ya kani ka mukotduma da ong ko wa kani ka PIL ym ye ko wow krehkaam neibhah da em chwa kiwi ki hukum ka Supreme Court heiyatoh wa kam kani ka mukotudma kiwa klam chaphang ki Service Matters namo ki kaam thung kreh.
Uwa yaleh mukotduma da kwah u wow pyndam yei thung kreh tangwa ka sorkar da jubab ko ya oo wa ka Notification toh neibynta kiwa sikai Class-I hadooh Class-VIII tangwa uni uwa yaleh mukotduma ym em kdaw che u ya kiwon ki Class wa kwah u pyndam noh.
Ka sorkar da ong ko wa ka Notification wa da pynmih haka 01-07-20 da ong wa emkaam MTET ya kiwa sikai Class-I hadooh Class-VIII wei ymtoh ya kiwa sikai Class-IX wa Class-X tangwa uwa yalehke mukotduma ym em kdaw che u ya kiwon kwah u.
Sa iwi wa chah boh uwa yaleh mukotduma toh neidaw wym em man u kam u bru uwa chah ktah wei da em ki hukum ka Supreme Court manda leh PIL da ki bru wym emyatoh iyi iyi wa ki kaam wei ha kani ka kynti uni u bru wan pyrchah hi-eh u yaki kaam thung kreh wei kam kini ki bru pynslem donhi yei e bichaar.
Ka sorkar da jubab ko leh wa katkam ka Advertisement thung kreh wa da pyndait lang haka mukotduma toh kawa neibynta ki Class-IX wa Class-X ki wym emkaam MTET tangwa hanla ka mukotduma ong ko ya kitu kiwa sikai Class-IX chapoh tangwa ym em sabut wow pynyoo wa da leh yeini hakhmat ka yung bichaar.
Kamtæ ka High Court neidaw wym chem ko wa kani ka PIL em yurim ko da iwa biang da pynkut noh ko ka tangwa da ong wa lada em won wa chem wa thung kreh khlem da bood kyndon ye ki wow yaleh PIL pyrchah ya kam kini ki jait thung kreh.
Discussion about this post