Ka Meghalaya High Court ynnin ka sngi da chong bichaar ko yaka PIL wa da yaleh da u Pawan Sharma pyrchah ya ka sorkar Meghalaya heiyatoh wa i oor i khlieh tnoom kyllung ka yung thymme ka Meghalaya Assembly wa em ha New Shillong.
Ya kani ka PIL da chong bichaar da u Justice Sanjib Banerjee, Chief Justice wa u Justice W. Diengdoh heiwa da ong ki wa ini i oor ini i tnoom da mih khubor i ha kyllieñ wei da mih leh chiboon ki yania nadooh wa jia ini.
Uwa yaleh PIL da ong u leh wa da em ka High Powered Committee kawa da booh yow chem yei daw wa jia ini wei wow tyrwa leh iyi wa toh u leh.
Kamtæ ka yung bichaar da ong ko wa ka sorkar jylla da leh ko yeiwa emkaam pyrchah ya kiwa chna ya kani ka yung kamjooh lada em i chna khalær wei ka yung bichaar ym sñiaw ko wa emkaam ko wow leh jhan ya kani ka mukotduma khlem da e laad chwa ya ki bor wa toh u pait yeini wow leh ki katkam ka aiñ.
Hajrong ini da ong wa da pynkut chwa ya kani ka PIL deiwa pynrap wa ym em khang ya kiwi wow yaleh mukotduma hajrong ini i jooh i kaam lada ki bor wa pait yeini ym em leh ki yei kaam yong ki.
