Jowai: Ka Gandhi Jayanti Week næ ka tayaw leh warom kyrpang yow Mahatma Gandhi heiyatoh wei dap 151 snem wa da pynman da ka Meghalaya Bharat Scouts & Guides ha kani ka sngi Pynsin 9 tarik Naichiphaw da poi ko cha wakut dei wan sakhilang u Octomewot Lamin, Chairman of Resource & Mobilisation, JHADC kam u kongsan, hei emlang u W. Lyngdoh, Jt. State Secretary MBS&G, State Headquarter, Shillong, kam u symbood kongsan, u Principal ka Thomas Jones Synod College, Jowai u Dr. R. R. Kharkongor, ki Scouts Master- Guides Captain, ki Scouts-Guides deilang ki Rovers wa ki Rangers.
Kam wow kdar luti ya ki bynta wa chakhmat yong kani ka prokram da em i rwai ya ka Prayer Song da waroh neitæ pynbood leh i pynkynmoo ya ka Scouts-Guides Promise hei yahkhmat u W. Lyngdoh, Jt. State Secretary, MBS&G State Headquarter, Shillong.
Ka Saramai Tariang, District Commissioner (G) West Jaiñtia Hills kam ka chongknor da e ko ki kyntien yahkhmat neitæ da yoh yei klam pdiang burom na u Rising Kharngi, Scout Master, i khanna pynsñiaw chaphang ka Gandhi Jayanti Week na ka Siami Shylla, District Organiser (G) West Jaiñtia Hills District katwa hawa kut da yoh ya ki kyntien khublei na u Adiam U Bthuh, Jt. District Secretary, MBS&G West Jaiñtia Hills.
Ha kani ka sngi da em leh i pynkup burom ya ki ar ngut ki Commissioner Scouts kiwa dapyndep ya ka Training ha u Naikhynde yong u snem 2019, kiwa kythup ya u Dr. R.R. Kharkongor, Principal Thomas Jones Synod College, Jowai wa u D.E. Pariat, Principal Lissi Pearl Secondary School, Mukhla. Neitae chooh chooh da sam leh ya ki Prize cha ki khynnah Scouts-Guides wa jop ha ki yakob waphær kiwa da pynman ha kini ki sngi wadep kiwa kynthup ya ka Drawing-Painting, Calligraphy Competition wa ka Art & Craft Competition wei da ekti leh ya ki Participation Certificate cha ki Rangers kiwa da ya chimbynta ha ka Cleaning Drive.
U W. Lyngdoh hei e kyntien kam u symbood kongsan da ong u man kayi kayi ka khubor wa sñiawsuk, wa napyrdi ki waboon ki District Association yong ka Bharat Scouts & Guides, ka Meghalaya Bharat Scouts & Guides, West Jaintia Hills toh man ko kawi don kawa pynman nae leh ya ka Gandhi Jayanti Week. Neitæ hawa kdar won yei klam heiyatoh wow Mahatma Gandhi, da kyrsu kyntu joor u ya ki dkhot ka seiñ waroh wow bood ye sikai wabha i yong oo wei wow leh ya ki kaam wa bha tam ki wow man u symbe ya ka pateiñ yong ka imlang sahlang, ka ri waka jaitbru da ka luti yong i hok, i chlur, wei maya yei suk.
U Octomewot Lamin, Chairman of Resource & Mobilise, JHADC hei klam kam u kongsan, da kdar u wow kynmoo, u khnna, pynsñiaw ya ki por kiwa da jooh embynta u kam u khynnah Scouts hapoh ka Bharat Scouts & Guides Movement wei da ong u leh ym ye u len i em yong oo waka Movement man i myntoi wei kyrkhu wakhroo ya oo.
Khaddooh chwa wow pynkut yei klam, u Octomewot e mynsien u ya ki khynnah Scouts- Guides wow imsngi ki u leh ya ki kaam katkam ki kular wa da chim da ki le tylli ki pariamkti kiwa ong wow leh yei wa miat wabha tam hei wow chakri ya ka imlang sahlang, ka ri waka jaitbru kamjooh wow chakri ya ki kaam niam kaam Blai.
