Shillong: Ka Meghalaya Bharat Scouts and Guides da pynkut ko yaka tayaw wa pynman yaka pynsñiawthooh paidbah namo ka Awareness Campaign Week kawa man kam chibynta wow lehkmen yaka lyngkhooh dap 70 snem wa da seiñ yaka kawa tip kam ka 70th Annual Foundation Day 2020 hajrong ka phang yong uni u snem kawa ong: “MBSG Fights Covid-19”.
Ya ka yalang wow pynkut ya kani ka lehkmen da pynman ha State Headquarter kawa em ha Shillong heiwa da em leh ka e snam sñiawbha namo ka Blood Donation Camp deiwa yakrehlang waka Indian Red Cross Society, Meghalaya Branch.
Haka yalang da embynta lang Dr. G. Myrthong, Dr. C. Budnah, Dr. B. Lato naka Regional Blood Bank, Pasteur Institute; u A.N. Sawian, General Secretary, Indian Red Cross Society, Meghalaya Branch, u R.O. Wallang, IFS (Retd),u H. Shabong wa u H. Marwein, President, AI JINGIM Voluntary Blood Donors’ Organization.
Ka A. Swer, State Secretary, Meghalaya Bharat Scouts and Guides da e ko ya ki ktien pdiang sñiawbha kamjooh da khana ko ya ki kaam wa da leh haka tayaw wa pynman yaki pynsñiawthooh paidbah ka Bharat Scouts and Guides. Da yaroh ko leh ya kiwa wan chakhmat wow e snam sñiawbha yow yarap yaka imlang sahlang.
Ya ini i e snam da wan pait leh da u R.G. Lyngdoh, Chairman, IRCS, Meghalaya Branch wa u A. Goenka, Member Managing Body.
Waroh da em 38 ngut kiwa wan chakhmat yow e snam heiwa da jied yaki 23 ngut kiwa biang wow e snam.
