Ka National Green Tribunal Principal Bench, New Delhi da pynkut noh ko yaka mukotduma heiyatoh wa i tih mooyong hapoh ka jylla Meghalaya deiwa pyndam leh yaka Committee warim wa thung ko kamjooh hadien wa ka Supreme Court da dep ko wow pynmih hukum heiyatoh wa ini i kaam.
Ka NGT da pynmih hukum ko wa kattu yow bood ya iwa da hukum daka Supreme Court chong ko ha ki bor ka jylla yow yada nei tih marpohkhyndaw iwa ym em man Scientific kamjooh kiwa khlem em pait da ka aiñ deilang wow pynim biang yaka rymaw khamtam yow yarap ya kitu kiwa chah ktah nei tih mooyong pyrchah yaka aiñ deiwa thung daka Oversight Committee kawa em 12 ngut ki dkhot kawa daw khlieh da u Additional Secretary, MoEF&CC kawa toh u em u Chairman ka EAC, MoEF&CC yow pait yaka EIA wa yatoh wa i tih mooyong, u Chairman ka Coal India, Joint Secretary, Ministry of Mining ka sorkar India, Director General of Mines Safety, Senior Scientist, Indian School of Mines/ IIT, Dhanbad, Regional Officers MoEF&CC & CPCB, Chairman, State PCB, Additional Chief Secretary wa pait yei tih marpohkhyndaw ka sorkar Meghalaya, PCCF (HoFF) Meghalaya wa u Additional DGP, uwa daw tyrwa da u DGP, Meghalaya.
U Regional Officer ka MoEF&CC, Shillong u man u kam u Member Secretary kani ka Committee u wow pait yei emkaam ka Committee na kawi ka sngi cha kawi. Ka Committee u yachem ko chisien chi bnai.
I kaam ka Committee toh wow pyntikna wa da bood yaki hukum ka Supreme Court wa kiwi ki hukum wa pynmih ka Tribunal yow khang yei tih mooyong dei yong rim wa iwa khlem em ki kyndon ka aiñ kamjooh yow pait ya u mooyong wa da dep tih wa kiwi ki kaam wa mih na ini.
Da ban joor wa ka Committee toh u pyntikna ko wym toh u em i tih mooyong wa pyrchah yaka aiñ deiwa pynkhreh lada em kam itæ, kamjooh lada em iwon iwon i jia wa sñiawsih.
Ka Committee ye ko wow chim yarap na kiwon kiwon heiwa u Chief Secretary ka Meghalaya u yarap u ya waroh iwa emkaam ka Committee.
Kamtæ waroh ki Report wa yatoh wa ki kaam pyrchah aiñ wa da e da ka Meghalaya Police u pait noh daka Oversight Committee kamjooh kiwon kiwon ki kaam wa dang sah heiwa yaki Report ka Committee toh u e cha ki Secretary, Mines, Coal wa MoEF&CC ka sorkar India wei wow booh ya ki leh ha ki Website ka jylla Meghalaya waka MoEF&CC.
Ka NGT da pynsñiaw ko leh yei yaroh yaka Committee warim wa da thung ko kawa da dep wow phah la 8 tylli ki Report heiwa ha ka Report wa 8 da tyrwa wow pynlait T. 90,80,445 neibynta ka NESAC (North Eastern Space Application Centre) kawa da mynjur wow pynlait.
Da mynjur leh yei pynkylla yei rukom pynemkaam yaka Meghalaya Environment Protection and Restoration Funds (MEPRF) deiwa emlang leh ha Oversight Committee ha ini i kaam.
Heiyatoh wa i rukom tih mooyong, wei wow pynkreh yaka Mining Plan deiwa leh daka Scientific Mining, i yada yaka rymaw daw chim yei rai wa khaddooh daka Oversight Committee.
Ka NGT da kdaw ko leh yei wym ye ka sorkar Meghalaya wow khang yei chalan tooh ya u mooyong deiwa ksoh ya kawi artylli deiwa pynlait won da ki spah tylli ki truck iwa da pyndooh nong yaka sorkar wei da chimpor ya u Chief Minister awjan 9 snem wow ong wa chimkhia wow pait yei chalan tooh ya u mooyong deiwa daw sdang noh ya ki Integrated Check Gate kiwa daw em leh yaki CCTV heiwa nachwa toh du ktien donhi wa kular yow murieh yei wym bood ya iwa da phah ka Tribunal.
Ka NGT da dep phah ko yaka sorkar wow booddien ya ki truck deiwa pyndait GPS wa ki RFID Tags, u paitbniah neiwon yoh mooyong ki Cement wa Thermal Power Plant deiwa pynkhlan yei krehkaam ka aiñ hadooh wow pynemkaam da ki Satellite wa kiwi kiwi, kamtæ ka NGT da ong ko wa lada ka sorkar bood ko ya ini, waroh i tih mooyong pyrchah yaka aiñ u kut i kamjooh ki hajar tylli ki truck wa kit mooyong pyrchah yaka aiñ ym lai luti ki.
Ya waroh ka hukum ka NGT ye wow yoh heini.
