Ka Ummulong Presbyterian College, West Jaiñtia Hills District kawa da sdang yei lehkmen lyngkhooh sngi seiñ namo ka Foundation Day nadooh ka 1 tarik uni u Naiynñiaw, kamjooh leh i dap 10 snem i lai luti ko wow e chakri heiyatoh wa i stat i tip, ynne ka sngi da pynkut noh ko yei lehkmen yong ka chirup i wan sakhilang u Symbood Montri Rangbah ka sorkar jylla, u Sñiawbhalang Dhar kam u kongsan, u M. Shylla, Retd. Executive Engineer, Health Engeneering Wing kam u symbood kongsan.
Ha kani ka sngi da emlang ki dkhot bor pait bor pynlai ka College namo ka Governing Body, u Principal ka College u A.J. Lymba, ka Vice Principal ka I. Shullai kiwa sikai, kiwa lai skur lai puræ wa kiwa chah khut sñiawbha.
U Sñiawbhalang Dhar hawa yaroh yei lai luti kani ka College ong u, wow pynlai yaki College haki thaaiñ wa cha palatsor ymtoh iwa suk nadooh wow pynbiang i su ya kiwa sikai, i emkaam waphær waphær wa kynthup ki kamra e sikai wa kiwi, tangwa dei yatylli wei kreh chitom da man ka Ummulong College kawa da ye ko u lai luti hadooh 10 snem katni.
Da kubur haroh u yei duna ki College hapoh Ri-loom Jaiñtia khamtam i khynnia ka Kiang Nangbah Government College iwa da hap bhah waka Morning Shift.
“Sñiawthooh i wa ka yung thaw puræ College wa ki skur neh ki kat jooh katwa ki khynnah won nangboon nangboon ki,” da ong u Sñiawbhalang deiwa e nongmuna u leh yei boon ki khynnah wa yakhun Matric man-u-snem.
Hawa khyruiñ u chei yakhun kreh sorkar leh ong u wa katni da phær bha hawa nujor nachwa neibhah da hap yakhun daki phaw hajar neibynta iwi ar ki kreh wa lait.
Kamtæ kyntu u wym toh ware u pait du yei kreh sorkar tangwa u pyrchang kiwi haroh ki laad neibhah hawa puræ puthi wym mut u yoh du yei kreh sorkar tangwa em leh chiboon ki laad yoh kreh najrong wow kyruiñ leh cha ki yung krehkaam ki bru samen.
Da pynchongchit ya kani ka sngi dei rwai i chaad kamjooh i yakob Mr. & Miss Ummulong Presbyterian College, kamjooh i sam yaki khusnaam cha kiwa jop haki yakob waphær waphær wada pynman chwa kani ka sngi.
Discussion about this post