Kam chibynta wow pynkut ya ka Purvottar Bharat Parikrama yong ka Indian Army kawa man ka lai uiñ ki chipai da ki kari ha waroh kawi ka thaaiñ mihsngi kawa tip leh kam ka North East Car Rally, neiliang u Lat ka Meghalaya, u Phagu Chauhan ynnin da kaweh lama yow pdiang ya kini kiwa lai luti kiwa da poi ha Umroi Military Station.
Ka Umroi Military Station da man ko leh ka thaw pynkut hadien wa da lai ki chipai 9 tylli ki jylla palat 20 sngi.
Ya kani ka Car Rally da kaweh lama yow sdang da u Army Commander HQ Eastern Command, u Lt Gen RP Kalita, PVSM, UYSM, AVSM, SM, VSM ha ka 22-03-23 na Fort Williams, Kolkata wei da lai luti kamwa 4000 Km ha kini 22 sngi wei da lai ki leh na kiwa boon ki thaw wa miat kamjooh ki thaw wa khor ka North East. Ha kani ka Rally da lai leh cha kiwa boon ki thaw sah naam ya ki chipai (War Memorials), da lai e ki leh yei klam e mynsien ha ki skur, ki College wei da lai pait ki leh ya ki thaw bna naam yong ki warim wa jah ha North East India.
Neiliang u Lat da pynkup burom u ya uwa yahkhmat kani ka Rally, u Brigadier KM Shende, Shaurya Chakra & Subedar Major wa u Honorary Captain, u Yogendra Singh Yadav, Param Vir Chakra wei da yaroh u leh yei kaam ka Indian Army wow chakri ya ka ri. Da kdaw u leh yei biang i ya krehlang hapyrdi ka ki bor chipai kamjooh ki bor sorkar hapoh Meghalaya kamjooh yei yarap wa da e cha ki chipai wa da chong ngiah ka jylla.
Ya kani ka Car Rally da pynman dei thmu wow wanrah yei yatylli hapoh ka ri, i sñiaw yajan wei i mynsien maya ri ki bru ka North East India yow khut ya waroh kiwa imlang sahlang yow chna ya ka India wa thymme, kawa khlan wa kawa mahajon. Sa iwi i thmu toh yow pynsñiawthooh chaphang ka Indian Army waka Agniveer Scheme.
Ha kani ka sngi da yoh laad leh wow pynyoo yei mahajon ka dustur riti ka thaaiñ North East yow pynchlur ya ki kaam uiñke suwari.
Ya kani ka yalang da pynman deiwa ya krehlang waka North Eastern Council hapoh ka Department of North Eastern Region kam chibynta ka “Azadi Ka Amrit Mahotsav”.
