Jowai: U montri rangbah ka jylla, u Conrad K. Sangma ynne da pynkut u ya ka yalap election neibynta ka By-Election wow man yong ka Ampati Constituency deiwa klam ya kiwa kitkaam wa kiwa krehkaam ka Party, ha yung u kyrtong ka Party u Clement G. Momin iwa em ha Latri heiwa da emlang u montri ka tnat i chait i khiah, u A.L. Hek wa u montri ka tnat PHE, u Samlin Malgniang.
“Man kiwa husiar wei kiwa pynyatylli ya kiwa thap vote wei wow kneiñ ya kiwa pyrchah wa kwah u pynbiej bru da ka poisa,” da ong u Conrad.
Da ong u ya kiwa kreh ka Party wow pynpsiah i sñiaw wa chaniah ki ya ka NPP ha ki paidbah.
“Ki liang wa pyrchah kwah ki u pynemkaam da i bor ka poisa we i won i kaamram yong i toh wow pynche i wa ini man i iwa bakla,” da ong u Conrad.
Da e mynsien u ya kiwa kreh ka party wa ka NPP da rap khlan ko ha Ampati Constituency hawa wyrchaw na ki por wa dadep wei wow kreh chitom ki ha kini ki sngi wow wan wow pynyatylli ya ki paidbah wow kyrchaan ki ya ka NPP.
U A.L. Hek, uwa da lai yalap cha ki chnong ka Constituency chirup wa kiwa kreh ka BJP wow kyrchaan ya u kyrtong ka Meghalaya Democratic Alliance (MDA) deiwa ong wa da krehlang i chirup wei kyrmen skem i wa ka Ampati daw jied ko ya u kyrtong ka NPP.
U Hek da kyntu u ya kiwa kreh ka Party wow em ha jar jiar ki Polling Station wow pynsuk ya ki paidbah kiwa kwah u jied ya ka NPP, neibhah kani toh ka laad kawa da e ya ki wow embynta ha i kylla.
Hawa pynsñiaw yei mynsien wa skem wow jop u Clement G. Momin kam u MLA, u Hek da ong u wa waroh ki Vote man ki kiwa kongsan wei kyntu u ya kiwa kreh ka party wow kreh chitom ki ha kini ki sngi wow wan.
Neiliang u MLA ka HSPDP uwa man leh u montri ka PHE, u Samlin da ong u wa u Clement G. Momin daw booh u ya ka parom wow sah khana ha Meghalaya deiwa jop ya ka Election na Ampati deiwa pynrem ya ka kyrtong ka Congress.
Discussion about this post