Shillong: Ka sorkar Meghalaya ynne ka sngi da mynjur ko yei pynkylla (Amendments) yaka Meghalaya Excise Rules iwa da yooluti ka sorkar wa daw yarap ko wow pynku yei yoh dan kamjooh yow pyndooh ya i liat tooh ki bai dan.
Hawa yaklam wa kiwa pathai khubor, u montri rangbah, u Conrad K Sangma da pyntip u wa da pynkylla yaka Rule 3 Sub Rule (2) yong ka Meghalaya Excise Rules.
U Conrad da pyntip u wa nachwa ki Bonded Warehouses ym em su ki yaka Excise Duty waka Gallon Age Fees heipor wa thied ki na ki Company.
“Ya kani ka dan jooh su manda dai ki Bonded Warehouses cha kiwa dai khutia. Ki Bonded Warehouse jooh thied ki na ki Company wei hadien wa dai ki cha ki Wine Store da su ki yaka Ad Valorem lane ka Excise Fee,” da ong u Conrad.
Da pyntip u wa naka T. 227 Klur wa yoh dan ka chnat Excise kamwa 90% toh kawa mih na kani ka Ad Valorem.
“Da pynkylla i ya ki kyndon (Rules) yow pyntikna wa ki Bonded Warehouse wow su chwa ki ya kani ka Excise Duty. Iwa mut ki Bonded Warehouse kattu hap ki wow su yaka Excise Duty pyn na i por wa thied ki na ka Company,” da ong u Conrad.
Da ong u leh wa da leh ya ini yow pyntikna waroh su ki ya kani ka dan yow lait u em kiwa dam u su ka yow pynku yaka yarong poisa ka sorkar. Wei da yooluti u wa da ini daw yoh ka sorkar sa T. 40-50 Klur ha uni u snem mang poisa.
Da ong u leh waka sorkar da booh ko leh T. 2 chi Case wa hap su da kiwa thied kiad ki dukan na Bonded Warehouse, iwa daw yarap wow pynku yaka khrong dan ka sorkar sa T. 60-70 Lak.
Da booh dan leh ya i kiad wa wanrah da ki chipai iwa jooh wanrah na Narangi ha Assam heiwa nachwa ka Excise Department ym jooh em booh dan ko wei daw kheiñ noh kattu 40% kam ka Ad Valorem iwa daw pynku yaka yoh poisa ka sorkar T. 1-1.5 klur yaka jylla.
Discussion about this post