Ka Election Commission of India (ECI) ynnin ka sngi da pynbna ko wow pynkylla ya ka tarik thap Vote ha ka Election MLA ka jylla Manipur. Ya ka First Phase ka Election da rah cha ka February 28 (Monday) katwa ya ka Second phase da rah cha ka March 5 (Saturday).
Ya ka First Phase ka Election nyngkong da booh wow pynman ha ka February 27 kawa man ka sngi Sunday wei ya ka Second Phase da booh wow pynman ha ka March 3.
Neiliang u heh ka Congress wa man leh kam u MP, u Jairam Ramesh da pynsñiaw u yei kemen wa da bien ka ECI wow ap yei kyrpaad ka Indian National Congress wow rah tarik ya ka sngi thap Vote ha Manipur.
Ha ka 8 tarik uni u bnai, u Chief Election Commissioner (CEC) ka India, u Sushil Chandra da wan u cha Manipur wei da kular u wow pynkylla ya ka tarik ka First Phase ka Election kamwa da dawa da ki Christan ka jylla wei wow yaklam ya ini ha Delhi.
Yeini da leh hadien wa ka seiñ ki Christan ka All Manipur Christian Organisation (AMCO) da dawa ko wow pynkylla noh ya ka tarik neidaw wa haap ko ha ka Sngi U Blai wa man ka sngi kyntang wow mane Blai ki Christan ka jylla. Kamjooh leh ka Manipur Pradesh Congress Committee da dawa ko wow rah noh cha ka tarik ka wym haap ha ka sngi Sunday.
