Ka Madan Mynkoipyrdi toh kawi na ki thaw emnaam emparom yong ka chnong Jowai wa em ha ka dong Loompyrdi Iongpiah, i man kyntang man kyrpang kani ka thaw toh iwa da naam da bna nadooh na warim, heiwa man ko ka thaw pyndep niam ka chnong ka Raij heipor Chaad Niam Behdieñkhlam, neitæ man ko leh ka thaw pyndep niam ka Loompyrdi Iongpiah kyrpang yow Pa Dolloi ka Elaka Jowai wei man ko leh kawi na ki thaw em parom yong ki por U Kiang Nangbah.
Waroh chi kattu kani ka thaw man ko kawa wiarnar wiardur tangwa sñiawsuk u tip wei yoosuk u sakhi wa ha uni u snem ka Dorbar Chnong Loompyrdi Iongpiah dei stat i chemphang wei chynna jngai kiwa yahkhmat dabooh thong wow pynkylladur noh ya kani ka thaw katkam i yah ka juk ka por.
U R.L. Bimi Suwer, General Secretary Dorbar Chnong Loompyrdi Iongpiah da ong u wa kam kiwa yahkhmat kamjooh ki khon ka Dorbar Chnong waroh em ki i jooh i sñiaw wow wanrah i kylladur ya kani ka thaw kawa da naam dabna nadooh nachwa wei kam ka Dorbar Chnong kawa embhah embynta ha ki kaam niam yong ka Raij Jowai em ko ki bynta wa kyrpang wow pyndep ha kani ka thaw neibynta i burom u Pa Dolloi ka Elaka Jowai kamjooh ha ka step Muchai yong ka Chaad Niam Behdieñkhlam. Kamtæ sñiaw u watoh iwa emkaam bha ya ki kam ki pateiñ wow leh iwa bha tam ha kani ka thaw neibynta i burom u loom u pdeiñ kamjooh ka Raij waroh kawi.
Khanna chooh chooh u lehwa i lut i sep neibynta ini i kaam toh da pynlut pynsep wa da su dasai bait na ka yarong yong ka Dorbar Chnong deilang wei e kyllooid mynsien ki khon ka Dorbar Chnong katwa joh i bor yong ki.
Hei pynkut u R.L. Bimee Suwer ong u leh i chna pynkylladur ya kani ka thaw man ko chibynta wow pynkhroo yei burom u Trekirot kamjooh leh wow man ka dak yong i e mysnien ya ka pateiñ wa katni kamjooh ya ka patein wa daw wan yow man kiwa tip u maya u kheiñkor kheiñ kyntang ya kam kini ki thaw em naam em parom yong u loom u pdeiñ kamjooh yong ka chnong ka raij.
