Neiliang ka DC ka East Khasi Hills da pyntip ko wa u khñiang COVID-19 da dep ktah u ya 13,961 ngut hapoh ka jylla ha kini ki 10 bnai heiwa da em 148 ngut kiwa da dooh yei mynsien yong ki.
Ha East Khasi Hills, 8676 ngut toh kiwa da dep yoh ya uni u khñiang heiwa da em leh 122 ngut kiwa yap na uni u khñiang. Kamtæ ka DC da ong ko wa kani ka khlam toh kawa pteiñ hapoh pyrthai wei da mih leh ki jait thymme uni u jait khñiang. “Kiwa boon na i da ye i wow bood yaki kyndon yada tangwa da chem wa em kiwa da leh khalær ki wym bood de yaki kyndon yada.”
Da kdaw leh wa u khñiang wa da kylla dur thymme wa mih na United Kingdom, Brazil wa South Africa toh uwa da dep chem leh hapoh ka ri kiwa man kiwa smat bha wow poor. Hanla ka sorkar India da sdang ko wow e ya i dawai yada COVID-19 tangwa ya ini i e dawai da leh chi bhah chisien deiwa jied ya kiwon wow yoh nyngkong, kamtæ katwa ym pu em 90% kiwa chong chnong wa yoh ya ini i dawai ym pu ye u man kiwa da yoh yada na uni u khñiang. Na ini i daw waroh emkaam wow man kiwa husiar wei kiwa bood yaki kyndon yada na uni u khñiang ha waroh i por khamtam manda em i cha lait.
Hajrong ini, da phah ya waroh wow bood yaki kyndon wa da booh daka chnat i chait i khiah. Waroh ki yung krehkaam, ki skur, ki College, ki waheh chnong da kyrpaad yaki wow pyntikna wa da bood yaki kyndon.
Kiwa leh pyrchah daw pynchitom yaki deiwa daiñ kuna hapoh ka Disaster Management Act waka Meghalaya Epidemic Diseases, Covid-19 Regulations 2020. Kiwa suba toh kiwa yoh ya uni u khñiang hap ki wow lai leh Test ha ki COVID Testing Centre wa em chajan ki. Ki paidbah ym toh u man ki kiwa kheiñstiñ iwa ye u wanrah biang yei ku kiwa dang yoh.
