U MLA ka Mowkiaw, u Nujorki Sungoh ynne hawa yaklam heiyatoh wa ka mang tyngka, da ong u wa heiyatoh wa ki sarok, dang em ki chnong wym pu em sarok hadooh katni leh kam ka chnong Madan Byrwai kawa em hapoh ka Constituency u wot hadien wa da sdang ya ka CM-Connect Scheme.
Da pynkynmoo biang u neibynta u sarok Khatkasla-Moojem-Jrikyndeng uwa emkaam bha neibhah wa pynyabi u ya ki bru ka Block-I cha ka Meghalaya, kamtæ da kyntu u ya ka sorkar wow chimkhia kyrpang neibynta uni u sarok.
Da ong u wa chi dep u chna ya uni u sarok daw pynsuk ko ya ki paidbah u lai u wan kiwa sah ha Block-I kiwa em 36 tylli ki chnong.
Da pynkynmoo u leh yeiwa dadep u wow dawa wow booh ya kawi ka PHC ha Psiar kawa daw ye u chakri ya waroh kiwa sah hapoh ka Block-I neibhah kamwa man kattæ hap ki wow lai cha Sahsniang PHC kawa jngai 30-40 Km.
Da ong u leh wa dang emkaam chooh ki Sub-Centre wei wot ka chnong yong oo ka Mukhap kawa da em palat 3000 ngut kiwa chong chnong ym em Sub-Centre ko hadooh katni leh.
Neibynta ka puræ puthi da dawa u wow wanrah ya kawi ka People’s College hapoh ka Constituency u yow lait ki bru kiwa na Sahsniang, Barato, Mukroh wow lai College cha Jowai wa Shangpung.
Da paan yarap u leh neibynta ka Saw Lyngdoh Higher Secondary School, deiwa ong u wa da emkaam bha yow pynchna ya ka yung skur.
Discussion about this post