Ka Swachhta Pakhwada Programme toh kawi na ki Programme wa da pynmih na ka yung krehkaam yong ka Ministry of Human Resource Govt. of India, ya kawa da hap u leh ha ki ar tayaw lynter deiwa sdang nadooh ka 1 Naikhynde wei u pynkut won hadooh ka 15 Naikhynde 2021, heiwa i thmu wa hakhmat dooh yong ka toh wow pynchlur ya kiwa sikai wa ki khynnah hajrong ka thong wow wanrah yei khooid i jngiar ha waroh ki liang iwa man leh dei yakrehlang ki dkhot yong ki SMC, ki manbei manpa wa i chimbynta lang ki bru wa chong chnong.
Ha ki ar tayaw yong kani ka Swachhta Pakhwada Programme kiwa sikai wa ki khynnah em ki ka bynta wa kyrpang hei wow leh u pyndep ya kiwa boon ki kaam neitæ chooh chooh leh da pachat won sei chimbynta lang ki dkhot yong ki SMC, ki manbei manpa wa ki waheh wasian yong ki chnong ki thaw.
Neiwa wa em ka khlam ha uni u snem neiliang ka Ministry of Human Resource ka sorkar India hajrong ka thong wow wanrah yei khooid i jngiar wei chait i khiah da pynkyrpang ya kani ka sngi toh wa i por wow yaklam chaphang ka kjut COVID-19 wa ki laad yada watoh u leh da ki khynnah, kiwa sikai, ki manbei manpa wa ka imlang sahlang waroh kawi.
Iwa yoosuk u sakhi ya kani ka Programme toh nalor i boonkaam ki khynnah wa kiwa sikai hei yaklam wei wow leh ya ki bynta wow wanrah yei khooid i jngiar liang wanang da wan leh ki por wow yoh ki khynnah u chimbynta heiliang i ya pynyoo pyntaw sap lyngba ki yakob dro dur, yakob thoh wa ki rukom chna tiar deiwa pynemkam ya ki tiar ki wymduk dei thied næ kiwa tip leh kam ki Waste Material.
Ha ki yalang pynkut yong kani ka sngi wa da pynman da ka Pohmusiang UPS SSA hei pynlai ka Head Teacher, ka Sonita Passah heiwa da em i saam ya ki Prize cha kiwa jop yong ki yakob waphær waphær katwa ha Chilliangraij SSA Upper Primary School, Jowai da emlang leh u Damehiwot Pde uwa man kam u Waheh Chnong ka Chilliangraij kam u kongsan wei da e mynsien u leh ya ki khynnah skur wow im sngi ki u pynwyrngia heiwon iwon i kaam wa miat wa bha neitæ leh da kyrsu kyntu u ya ki khynnah wow chimkhia ki u bood ya ki adong sorkar kiwa man ki laad yada nei poor u khñiang kjut COVID-19.
Ka Handakaru Iakai, kawa man ka Head Teacher ka Chilliangraij SSA Upper Primary School, Jowai da e ko ya ki kyntien wow kyntu ya ki khynnah wow ksoh u kune ki yeiwon yeiwon i sikai, i batai iwa da yoh ha ki ar tayaw yong kani ka Programme wei wow man leh ki khynnah kiwa tip u ri u ksoh yei akor i burom wei wow pyndep hok leh yei kaamram kam ki khynnah skur.
