Ka Nangbah Youth Awakening Movement (NYAM) ynne ka sngi da pynlait paidbah ko ya ka kari kit wakjut (Ambulance) kawa da yarap daka Star Cement, Lumshnong haka yalang wada emlang ki bru waheh ka chnong Nangbah, ki kynhun naki seiñ wapher, kiwa chnong wa kiwi.
Ha kani ka jooh ka sngi neiliang ka Nangbah Youth Awakening Movement deilang ka Ai Jingim ABDO Catholic Youth Mihmyntdu da pynman haroh ki yei e snaam sñiawbha deiwa kyrchaan ka Blood Centre Civil Hospital Jowai.
U kongsan yong kani ka sngi u Ram Hinge, DTO East Jaiñtia Hills District hawa klam da ban joor u hajrong i emkaam wow em i bahkhlieh wa biang wei kammon u biang i rukom chakri ya u paidbah ym du wa em ka Ambulance katwa i chakri won ym poi cheiwon cheiwon.
Ka Dr. P. Shylla In-Charge Jowai Blood Bank hawa pynche yaki kyndon neibynta u e snaam kyntu haroh ko ya ki paidbah wymtoh u tieñ ki wow wan chakhmat, neibhah ki bor ka Blood Bank leh ym chim snaam kulmar ki khlem da pyndep ya ki Test waphær, wei wym chim ki leh la chem ki wym biang wot lada u bru kwah bait u wow e snaam.
Kiwi won wa e i klam heiyatoh i pynlait ya ka Ambulance kamjooh leh hajrong i emkaam u e sñiawbha yei snaam kynthup u MDC ka thaaiñ u Lakhon Biam, u MDC warim u Shemhok Garod, u Dr. D. Hinge In-Charge Nangbah PHC, u Rev. Lumlang Khongthohrem, Rev. S.S. Nongrum, u Tonroy Iongwai Waheh Chnong Nangbah, u Benedict Marweiñ VDBO ka Ai Jingim wa kiwi haka yalang wa pynlai da u Dr. Embok Padit.
Hei e snaam sñiawbha ha Dorbar Hall Mukoisyiem Nangbah napyrdi ki 16 ngut wa wan chakhmat u e snam ha kani ka sngi kiwa man biang toh 10 ngut.
