Ynnin i miet ka 19 tarik heipor kamwa 10:00 waje da em uwi u bru wa tip pyrtuid kam u Paila Kyndait (70 snem) da chah tyrrah u ha kawi ka kari ha Iawmusiang, Jowai wei da thiah mynsoo u ha sarok khlem em wa rap ya oo.
Heitæ heipor wa lai luti ki ar ngut ki khynroo kiwa kynthup ya u Samanlangki Lamare wa u Falange Bai Passah da hiar ki na kari wow klam ya uni u bru wa thiah mynsoo ha sarok wei da pyntip ki wut-wut cha ka 108 wa cha ki pulit.
Hadien kattu katni por katwa dang yang ki ya ka Ambulance wa ki pulit da kyrriah ki ya u Paila na sarok cha iwi i trep wa em harood khnang wow lait u na u slap wa joor.
Heitæ da wan ka Ambulance 108 wa ki pulit wei da chem wa u Paila da mynsoo u ha kjat wa ha rupai wei da kit wot ya oo wut-wut cha Civil Hospital, Jowai.
Hawa yaklam wa u Wyrta kini ki ar ngut da khana ki wa heipor wa wan thap phñiang ki da yoo ki ya uwi u bru wa thiah ha madan wa i snaam wa kai na oo, wei khlem artatien da hiar ki wow e yarap ya oo wei da phone ki leh wut-wut cha ki bor wa emkaam.
Da kyntu ki leh ya kiwi tawon ki bru wa lada jia wa chem ki kam ini i jia, ymtoh u artatien ki wow e yarap neibhah ymtip boi kiwi leh daw bood ki ya kani ka luti neibhah wa ha pyrthai emkaam yei yarap kylliang.
Kamwa da sakhi ynnin, neiliang u Wyrta leh e khublei wei kitbok i ya kini ki ar ngut wei kyrpang leh ya kiwa kreh ya 108, ‘E wa u Blai u kyrkhu kyrdoh u ya phi ha ki kaam yong phi’.
