Katkam ka kyrwoh wa da yoh na u Waheh Chnong ka Mowkyndeng, ha i janmiet yong ka 04-07-2021, ha i por kamwa 4 waje, ar ngut ki kynthai wa tip pyrtuid kam ka Finie Suchiang (18 snem), ka khon yong ka Iolanda Suchiang wa ka Arkini Suchiang (12 snem), ka khon yong ka Macdalin Suchiang kiwa na ka chnong Mulieh, WJH da lait ki nei ngam um ha ka wah Syllek (Tyngkla) ha i thaw wa em hajan ka chnong Mowkyndeng, WJH deiwa yarap ki 4 ngut ki khynroo ka chnong Mowkyndeng wa kynthup ya u Waiphangki Pala uwa khut leh kam u Maidong (22 snem) , U Thranglut-o-ki Pala (17 snem), U Onyxstone Pala (19 snem) wa u Kyrpang-i-man Suchiang (19 snem) kiwa da ye wow pynlait im ya kini ki kynthai.
Katkam wa pyntip u Waiphangki Pala, da ong wa kini ki khynnah kynthai da yalehke ki ha kani ka wah wei syndet syndet da yoh sñiaw wa kawi na ki da kbai ko wow paan yarap, khlem da pynslem de da noh u chapoh um wei da yimpa u hadooh wa poi cha ka kynthai kawa dang kyrthai um wei deiwa yaleh deiwa joor da ye u wow pynlait ya ka wei hadien ini da pyntip ko ya oo wa dang em sa kawi ka khynnah kawa dang em chapoh um.
Kamtæ u Waiphang deilang wa ki 3 ngut ki lok u da yimpa ki wei ngam ki chadooh cha tre ka um yow thooh ya kani ka khynnah. Hadien kamwa 3-4 minit i thooh, u Thranglut-o-ki da chem u ya kani ka khynnah wei mar ya sai ki ya kani ka khynnah napoh da chem wa da man ko kam kawa da yap. Kamtæ da sdang ki wow khnion na rupai yow leh CPR yow mih ka um wei yow ye ko wow riñ mynsien deiwa pynsiah ya ka la-ær leh na ktien. Hadien kamwa kattu katni por kani ka khynnah da prai ko ya ka um wei da ye ko leh wow riñ mynsien biang tangwa ym pu tip yong bru ko.
Neiliang kini kiwa pynlait im da lai pyntip ki wut wut cha kiwa ha yung kini ki khynnah. Ya ka Arkini Suchiang da pynkit noh ya ka cha CHC Laskein. Neidaw won wa da tlot wei ym ye ko wow riñ mynsien bha, ym ye wow sumaar ya ka ha CHC wei da phah wow kit noh ya ka cha Hospital ha Jowai wei katni ya kani ka khynnah da em ko hapoh i sumaar ki Doctor ha Dr. Norman Tunnel Hospital, Jowai. Wei hadooh wa pynmih ya ka khubor, kani ka khynnah man ko kawa da lait nei maa.
Neiliang yong u Waheh Chnong Mowkyndeng, u Syrpai Synnah da sñiawngooh u hadooh kattæ yei chlur yong kini ki 4 ngut ki khynroo wei da kitbok kitrwiang u ya kini ki arngut ki khynnah kynthai wow yoh smat ki yei chait i khiah.
