Ka Amabel Susngi kawa man kam kawa rwai kamjooh kawa sikai rwai kawa da yoh yaka Samvaad Fellowship naka Tata Steel Foundation, ynnin ka sngi da pynlait ko yaka kot rwai yong ka kawa da e pyrtuid “Ha Yupiam Ka Bei” kiwa man ki rwai kynoi thiah kam chibynta ka Pan India Tribal Conclave “Samvaad” kawa man leh ka rynsan ya ki jaitbru ri-loom wow pynyoo yaka dustur riti, ki chaad, ki rwai tynre hadooh ki baam kawa da pynman ha Jamshedpur, Jharkhand nadooh ka 15 tarik uni u bnai heiwa da pynkut haka 19 tarik.
Kani ka kot toh kawa da chon wei da pynlut da ka Samvaad wei da pynlai yaaw ya ka da ka Martin Luther Christian University (MLCU) wei em ko palat 25 tylli ki rwai kynoi thiah kiwa na Ri-loom Khasi, Ri-loom Jaiñtia wa na Ri-Bhoi kiwa da rwai katkam ki ktien wa em ha kini ki thaw.
Kini ki rwai toh kiwa da pynlang pynlum wei da jied kyrpang da ka Amabel yow pynneh pynsah ya ki kiwa man leh ki yong rim yong jah wei ha kani ka kot najrong ki dur ki dar da em leh ki Musical Notation yow tip kammon u rwai ya kini ki sur kynoi thiah kamjooh leh kammon wow tem ki.
Ya kini ki rwai da pynklla leh cha ka ktien English wei ya kini ki rwai ye leh wow ap ha u YouTube Channel “Tyn-re”.
Ya kani ka kot ye wow yoh leh na Martin Luther Christian University.
Ka Amabel Susngi toh kawa dang yaleh PhD katni hapoh ka Martin Luther Christian University wei kawa sikai kam ka Music Teacher ha Hill Crest Higher Secondary School nadooh u snem 2022 katwa yaka Samvaad Fellowship da yoh ko ha u snem 2021.
Discussion about this post