Ynne ka sngi, ka Meghalaya Rural Bank (MRB) da pynlait ko yaki kor Micro ATM cha ki Bank Sakhis ka Meghalaya State Rural Livelihoods Society (MSRLS) ki wakreh leh kam ki Business Corresspondent ka Meghalaya Rural Bank.
Ka Meghalaya Rural Bank toh kawa em 90 tylli ki chnat wei da thap poisa haka hadooh T. 2400 klur kawa e yarap haki kaam poisa poilaiñ ha waroh ki kdong ki chmiang ka jylla. Da em ko leh 7.50 lak ngut ki bru wa pynemkaam yaka kiwa dang boon man-ka-sngi.
Ki MSRL toh ki chnat (Nodal Agency) ka Community & Rural Development Department ka sorkar Meghalaya yow pynkrehkaam yaka National Rural Livelihood Mission.
Ka MRB deilang waka MSRLS da yarap ki haka kaam poisa yong ki 752 tylli ki SHG iwa da poi T. 5.61 klur ha u snem 2018-2019 wei ini da ko ka cha 1741 tylli wei ka poisa leh da poi ko T. 27.10 klur ha u snem 2019-2020. Kamtæ yow pynkaap chooh chooh yaki kaam da booh haki Bank Sakhis kiwa kreh waki Business Correspondents da ki Micro ATM yow ye wow pynpoi yei chakri ki Bank cha kiwa boon chooh chooh ki thaw kamjooh yow wanrah ko ya kiwa boon ki bru wow pynemkaam ki yaki Bank.
Lyngba ki Micro ATM, daw ye wow sai kamjooh wow thap poisa hadooh wow phah poisa wa kiwi kiwi khlem da hap lai cha ki chnat Bank wei hap ki du wow yachem waki Business Correspondents.
Ya ini da kyrchaan poisa daka National Bank for Agriculture and Rural Development (NABARD) heiwa kawi ka Micro ATM da chong dor ko T. 31,000 heiwa ka NABARD da yarap ko T. 22,000.
Hadooh ynne da e sikai yaki 10 ngut ki Business Correspondents wow pynemkaam yaki Micro ATM wei daw pynlait leh sa 90 tylli kini ki ATM deiwa ya krehlang wa ka MSRLS deilang waka NABARD.
