Ka Ministry of Road Transport & Highways (MoRTH) ka sorkar India da pynbna ko wa da pynlait ko Rs. 290 klur ka poisa yow chan pynmiat ya u sarok NH-6 ha ki bynta ka Jowai hadooh Ratacherra.
Ini toh hadien wa u Montri Rangbah ka jylla, u Conrad K Sangma ha ka 24 tarik u bnai wa dep da lai yachem u ya u Montri ka sorkar pyrdi wa pait ya kani ka chnat, u Nitin Gadkari heiwa da rah lang u wa ki dur ki dar wa ki kot ki sla yow pynyoo yei long i man uni u sarok uwa da sih bha katni.
Neiliang u MP ka Shillong, u Ricky Syngkon leh da lai yachem u wa u Nitin ha kani ka tayaaw deiwa rah lang ya ka chithi yow pynsñiaw hadooh katwon chah ktah ym du ka Meghalaya tangwa kiwi ki jylla leh kam ka Mizoram, Tripura waka Assam neidaw wa joor sih uni u sarok ha ki bynta ka East Jaiñtia Hills khamtam.
Uni u sarok uwa da chah ktah chooh chooh kattæ heini i por wa joor slap, da man u uwa da chah ieh bieñ wot hadien wa dadep yaleh da ka PIL ha ka Meghalaya High Court tangwa i chna pynmiat ya oo da sahetiñ i.
Discussion about this post