Ka Jaiñtia Students’ Movement (JSM) ha ka 28 tarik uni u bnai da yoh ko wow pynlait paidbah ya artylli ka kari Ambulance yow chakri ya ki paidbah ka thaaiñ khamtam kiwa wan na ki manyung wa dooh wa duk.
Ya ka yalang pynlait paidbah da pynman ha ka chnong Mookhep, East Jaiñtia Hills kawa pynlai da u Kerbhame Dkhar, Asst. Secretary JSM Central Body ryngkat i ngooh Blai.
Hachwa wow sdang da yoh i klam pdiang burom na u Wellson RD Siangshai uwa man u President ka JSM Eastern Region wei da pynbood sa i chaad pdiang burom na ki khynroo khyllood ka chnong Mookhep.
Ya kini ki Ambulance da pynlait da u Leningstar Rymbai kam u kongsan uwa man leh kam u President ka JSM Central Body uwa da sneiñ kyntu ya ki dkhot ka JSM waroh wow smat ki wow kit ya ka lyngkor wow e yei chakri wa paka ya ka imlang sahlang ha ki liang waroh wei deiwa yoh u e sa kini ki Ambulance daw nang ye chooh chooh u e ki kti yarap sa cha kiwa kjut wa chitom yow pynpoi smat cha ki thaw sumaar.
Da yoh leh yei klam e sikai yei emkaam wow e snaam na u Andreas Marweiñ, General Secretary ka Ai Jingim, VBDO Shillong neibhah ini ymtoh i kaam wa maa wei wow wan chakhmat wow e sñiawbha yei snaam neibhah wa yarap ko leh yei chait i khiah najrong wa yarap ko wow pynim ya kitu kiwa em hei maa. Hajrong kani ka jooh ka phang da yoh leh yei klam pynche sa na u Emlangki Supuh uwa man u Adviser ka Ephphatha Society Moowakhu, EJHD.
Ha kani ka sngi da yoh leh yei klam na u Waheh Chnong ka Mookhep, u Denis Siangshai wa na u Roitre Dkhar, General Secretary JSM Central Body, u Heihokmi Supuh, President JSM Western Region deiwa emlang u Waheh Chnong ka Pamra Kmai, u Iaikiewbha Rymbai, Secretary Chnong Mookhep u Francis Dkhar, Chairman Chnong Mookhep, u Arkycious Dhar wa kiwa kitkaam, kiwa yahkhmat ka seiñ na ki Region, Circle wa Unit.
Hachwa wow pynkut da yoh yei kyntien sñiawngooh na u Shanskem Suchiang, General Secretary JSM Western Region wei da pynkut da ki kyntien e khublei na u Francis Dkhar, Finance Secretary warim ka seiñ.
Kiwon kiwon kiwa chong chnong khamtam kiwa na Jaiñtia Hills kiwa emkaam Ambulance ye ki wow Phone ha kini ki Number: 8787789140/9383188128.
Discussion about this post