U Kiang Bai Lakiang, Deputy Director Horticulture, Shillong ynne ka sngi da pynlait paidbah u ya ki Ticket Lucky Draw yong ka Kur Sookpoh Khadar Wyrnai Jowai kawa daw pynkhle haka 22-04-23 kawa man leh ka sngi pynman Fete ka Kur Sookpoh.
Haka yalang pynlait Ticket Lucky Draw wa pynlai da u Shape Paswet, Vice President ha yung ka Kur Sookpoh ha Chiliangraij Jowai, da emlang ki waheh wasian ka kur kamjooh ki kattu katni ki khon ka Kur Sookpoh.
U waheh ka kur u Womlin Pakynteiñ ong u wa i pynman yaka Fete kur khlieh u snem toh yow pynmih yarong poisa khnang yow ye ka kur u leh iwon iwon i kaam neibynta i bha i miat.
Heijooh i por da pynchat u leh ki yumut wa emkaam yaka kur u leh ko kam ki jait booh naam khnang wa ki pateiñ hadien u tip ki.
Neiliang u kongsan u Kiang Bai Lakiang hawa klam, da pynsñiaw u yei sñiaw sarong sñiaw kmen kam u khon ka Kur Sookpoh wei wot hei boonkam leh dohyap bait u wow wan.
Hawa pynrap yei emkaam u rah chooh chooh yei burom i naam ka kur kat chawa lai, e burom u leh ya ki waheh wa sian kiwa da yahluti u wanrah i maya i yatylli para kur.
Neitæ kamwa i pynman hi yaka Fete kur toh yow pynmih ka yarong poisa neibynta i angnood u leh chiboon ki kaam, da khut kyntu kyrsu u leh ya ki para kur u sai kyllooid mynsiem ki wow yarap katwa ye i bor neibynta i naam i burom ka kur.
Ya kini ki Ticket Lucky Draw ye u yoh hei dor T. 30 chi sla wei ki Prize man ki kamni ha wah:
1st Prize- Rs. 1,00,000
2nd Prize- Rs. 50,000
3rd Prize- Rs. 30,000
Wa 20 tylli ki Consolation Prize kiwa mar Rs. 1000 kawi.
