Jowai: U Kyrmen Shylla, u montri ka sorkar jylla uwa man leh u MLA naka Khliehriat Constituency, ynne ka sngi da pynlait paidbah u ya ki artylli ki truck kit-jhep hapoh ka Constituency yong oo kawi ha chnong Sohkymphor katwa kawi won ha chnong Rymbai, East Jaiñtia Hills District.
Ya kitai ki truck kit-jhep da yoh lyngba ka Scheme Chief Minister’s Special Rural Development Fund (CMSRDF).
U Kyrmen Shylla hawa e yei klam haka yalang pynlait paidbah ya katai ka truck kit-jhep ha chnong Rymbai da ong u wa nyngkong da em u i sñiawdooh kyrmen hawa pait yaki kyndon (Guidelines) yong ka MLA Scheme neibhah yei wow e du ki kari Ambulance, tangwa hadien i thooh luti da lai pynsñiaw ha u montri ryngbah ka jylla yaki dawa wa u paidbah toh u wow yoh wei kamtæ da mankaam noh.
Neitæ da kyntu u wow sumaar syndong yaka wei yooluti u wa kani ka kari u e ko i chakri neibynta kawi pa kawi ka yung wei daw wanrah leh ya i kylla kawa yatoh wa ka khooid ka suba.
“Kani toh ka hok wa phi toh u yoh, neibhah phi da jied phi ya nga kam uwa mihkhmat wow thooh yaki hok yong phi,” ong u Shylla.
Ha i jooh i por da ong u wa lyngba ki Scheme waphær waphær daw thooh ki laad ki luti wow pynyoh yarap cha kiwi de ki chnong ki thaw katkam i dawa yong ki paidbah.
Kamwa ka lehkhooid man ko kawa emkaam dooh, da kyntu u yaki paaid chong chnong wow sdang yaka lehkhooid na samen wei wow em leh ka kitkhlieh neibynta ka khooid ka suba kat wym pu der i por.
Ha ka yalang wa pynlai u Justice Lyngdoh u Waheh Chnong Rymbai, kiwa klam kynthup nadooh u Secretary Chnong Rymbai u Blase-used Rymbai, u L.K. Swer u Acting Dolloi Elaka Rymbai, u Finelyness Bareh Local MDC, u P. Bareh wa kiwi kiwa pynsñiaw yei kmen wa khroo hajrong i ye u MLA wow pynmankaam ya i angnood yong ki kawa da slem.
Discussion about this post