Kam chibynta wow pteiñ u e yarap cha ki warep, neiliang u Prime Minister Narendra Modi ynnin ka 1 tarik da pynlait u ya ka bhah wa chiphaw namo ka 10th Instalment ka poisa hapoh ka Pradhan Mantri Kisan Samman Nidhi (PM-KISAN).
Ka poisa wa da pynlait wei da phah leh da man ko palat T. 20,000 klur cha palat 10 klur tylli ki manyung ki warep.
U Modi da pynlait u leh ya ka Equity Grant kawa palat T. 14 klur cha ki 351 tylli ki Farmer Producer Organizations (FPOs), iwa daw pynmyntoi ya palat 1.24 lak ngut ki warep.
U Prime Minister da yaklam u leh lyngba ka Video Conference wa ki FPO kiwa na Uttarakhand, Punjab, Rajasthan, Uttar Pradesh, Tamil Nadu wa Gujarat.
U Modi da pyntip u wa ka ri da pynlut ko 2 lak 60 hajar klur tyngka yow pynyoh baam rachon cha kitu kiwa tlot ha ka imlang sahlang heipor wa em ka khlam.
Da khana u leh chaphang ka PM Kisan Samman Nidhi kawa man leh kawi na ki laad yarap ya ki warep wei lada kheiñ ya ka poisa wa da pynlait ha kani ka sngi da dep wow pynlait la T. 1.80 lakh klur cha ki Bank Account ki warep.
