U DC ka East Jaiñtia Hills da pyntip u wa neidaw wa pteiñ i joor u slap hapoh ka District kamjooh ha ka jylla waroh kawi ha kini ki tayaw wa da lai wei da ktah ko leh chiboon yei lai i wan ki kari neidaw wa oor khyndaw, oor moo wei da booh ko leh hei maa ya ki bru kamjooh ki mrad.
Chooh chooh leh wa i hiar ka um na chrooh ki loom toh iwa da ktah joor bha ya u sarokbah NH06 ha ki bynta wa em hajan ka Toll Plaza ka Lumshnong hadooh wa da chah rah wei da ngam u sarok hadooh wym hoi de u pynemkaam ya uni u sarok.
Kamtæ u DC da pynmih hukum wow chah ya ki kari khian kiwa em hapoh 3MT i khia wow lai ki lyngba u sarok ka Star Cement na Brichyrnot-Lumshnong tangwa ym chah ya ki truck wa kiwi ki kari wa heh wow lai ki na uni u sarok.
Ki kari wa kit ya ki mar wa emkaam (Essential Commodities) cha kiwi ki jylla hap ki wow pynhiar ya ki mar te pynkit ha ki kari khian ha ka laad wow psiah cha uni u sarok ka Star Cement.
Ki kari wa heh u chah u lai ki du hadien wa dep u pynchna ya u sarok wa sih.
Kani ka hukum toh kawa krehkaam nadooh ynne ka 16 tarik.
Neiliang u Lahkmen Rymbui uwa man kam u Chairman ka Regional Committee kawa da chna ynne ka sngi da lai pait u ya kani ka thaw wa oor u sarok ynne deiwa emlang leh u MLA ka Sutnga-Saipung, u Shitlang Pale.
Neiliang ki bor District leh da yarap e baam ki ya ki paidbah kiwa sahkut.
