Kam chibynta wow pynyoo yei bor wow chna mar ka ri katkam ka thong ka ‘Aatmanirbhar Bharat’, neiliang u Prime Minister ka ri, u Narendra Modi ynne da pynlait u ya ka jhaad wa kit lieñsuiñ namo ka Indian Naval Ship (INS) Vikrant ha Cochin Shipyard Limited (CSL) kawa da chna pyn hapoh ka ri hi. Ha kani ka sngi, u Prime Minister wa pynlait u leh ya ka chap wa thymme ka Navy kawa da chna deiwa pynemburom ya u Chhatrapati Shivaji wei da pynam noh ya ka chap warim kawa nadooh i por pharæng.
U Modi hawa e yei klam da ong u wa da ini waroh kiwa chong chnong ka ri da sakhi ki yei mih ka sngi wa thymme ka mynried ka ri wei kani da man ko i angnood yong kiwa yaleh laitlooid ka ri yow man kawa ye u leh yeiwa kwah ko kamjooh ka ri India kawa khlan.
Da ong u leh wa kani ka jhaad Vikrant ym toh du ka lieñ yapam tangwa i dak wa pynyoo yei kreh chitom, i sap wa em hapoh ka ri ha uni u spah snem wa 21 wei ka Vikrant man ko leh i jubab ka India yow man kam kawi na ki ri wa ye u chna ya kini ki jhaad Aircraft Carrier.
U Modi da ong u leh wa kani ka jhaad man ko katkam kawi ka chnong sor kawa ye u pynmih bordiñ neibynta 5000 tylli ki manyung kawa da chna da pynwandur nadooh ki Steel wa waroh kiwi da ki Scientist ka DRDO wa da ki karkhana wa em hapoh India.
Heiyatoh waka chap, u Modi da ong u wa ynne ka sngi ka Indian Navy da yoh ko leh ya ka lama thymme kawa da chna yow kynmoo warom ya u Chhatrapati Shivaji.
Kani ka jhaad Vikrant toh kawa jrong 262.5 Meter wei kamai ko 61.6 Meter, kawa ye u lai 28 Knots i smat. Em ko 2,200 tylli ki kamra wei emkaam 1600 ngut ki bru wow pynlai ka.
Ye ko wow kit ya 30 tylli ki lieñsuiñ wa kynthup ya ki MiG-29K Fighter Jets, ki Kamov-31, MH-60R Multi-Role Helicopters, deilang wa ki lieñsuiñ Advanced Light Helicopters (ALH) wa Light Combat Aircraft (LCA) (Navy) kiwa chna hapoh ka ri hi.
