Ka Loomiongkjam Dorbar Chnong, Jowai dap ko dei burom wa khroo ya i chynna jngai uwi na ki khon ka chnong uwa im sngi hei thoh hei taar ya ki kot Niamtre wa kiwi tawan ki jait kot heiwa da pynlait sa ya 3 tylli ki kot Niamtre wa da thoh da u Wh. Dawmanchuh Lamar haka yalang wa da pynman daka chnong haka 20 tarik wa da ekti da uwa thoh kot haka chnong wow pyndep.
Nyngkong, u Waheh Chnong ka Loomiongkjam u Wh. M. Challam da wai phang wei da pdiang burom u ya waroh ki khon ka chnong kiwa wan kamjooh ya ki lok ki jor. Da e ya i ngooh i dem da u Kni ka chnong heijooh i por u Chairman ka Niamtre Committee u Wh. Kyrchan Synnah. Hei ngooh hei dem yong oo da kyrpaad kyrpon ya ki Blai ki Syiem yow nang mih chooh chooh ki khai ki piar ki wow pynsuk ya ka chnong ka thaw, ka raij ka muluk, ka ri wa ka jaitbru.
Neiliang uwa thoh kot, da khana che u wa ki Blai ki Syiem da pynyoo laad pynyoo luti ki ya oo heiwa da mih i thrang yong oo u thoh ya kam kini ki kot khnang wa ka mynried yong ka Niamtre yow man ko kawa yoh yarap ha waroh ki liang. Da ong haroh u wa kini ki 3 tylli ki kot man ki kiwa em yumut hadooh kattæ kattæ. Kam uwa thoh da khana u wa iwon iwon iwa thoh u da pynchong yurim u deiwa yoh yutip wa bniah na ki waheh wasian, ki tymmen ki san, kamjooh na ki lok ki jor.
Hei klam won yong u Wh. Dawanpoi Passah da yaroh u chiboon ya ki kaam wa khroo yong uwa thohkot.
Ya ka kot wa e pyrtuid “Ka Jingsngewthuh ia ka Niam Tip briew Tip Blei u Hynniewtrep-1” da pynlait da u Wh. E.M.H Passah uwa da ong wa kini ki kot man ki kam ka bei u pa ki wow e yumut wa bha ya waroh ki khon ka Niamtre.
Ya ka kot wa pyrtuid “Ka Sur Na Mynsien” da pynlait da u Wh. S.K. Lato uwa da pynkup bor chooh chooh ya uni uwa thoh kot wow nang ye chooh u wow pynmih chiboon kam kini ki jait kot.
Ya ka kot wa pyrtuid “I hikai ka Niam Tip Bru Tip Blai ia ki khon ka Niamtre” da pynlait da u Wh. W. Pakyntein uwa da ong wa kam uwa jan yung jan sem da jooh sakhi u ya ki kaam wa bha yong uwa thoh kot hapoh chnong poh thaw kam ha ki kaam thoh Drama, thoh sur Sukra kamtæ ter ter.
Da pynkup burom ya uwa thoh kot da u General Secretary ka chnong u Wh. H. Challam deilang wa u Asst. General Secretary u Wh. N. Passah.
Da e ya ki kyntien khublei da u Secretary ka Niamtre Committee u Wh. D. Passah uwa da e khublei kyrpang ya uwa thoh, ya ki khon ka chnong, ya ki lok ki jor na jan na jngai.
Ya kini ki 3 tylli ki kot ye phi u yoh na yung krehkaam ka Loomiongkjam Dorbar Chnong, Jowai.
